महावाणिज्य दूतावासभित्रै ११ नेपाली अलपत्र

दोहा । खाडी मुलुक जाने कामदारका लागि सरकारले ‘फ्री भिसा, फ्री टिकट’ लागू भएको बताइरहँदा लाखौं रकम तिरेर त्यहाँ पुगेका ११ नेपाली बिचल्लीमा परेका छन् । उनीहरू गत २२ साउनमा त्यहाँ पुगेका थिए ।

काठमाडौंको सुकेधारामा रहेको हलेसी ओभरसिज म्यानपावरलाई मोटो पैसा बुझाएर साउदी अरबमा रहेको एक होटलमा पठाएको र म्यानपावरले सम्झौता गरेअनुसारको काम र तलब नपाएपछि अलपत्र परेको पीडितले बताएका छन् । त्यहाँ होटलले मागेअनुसार म्यानपावरले कामदार नपठाउँदा आफूहरू अलपत्र परेको उनीहरूले बताए ।

धन कमाउने मिठो सपना बोकेर रोजगारीका लागि साउदी पुगेका उनीहरूलाई कम्पनीले कोठाबाट निकालेपछि भोकभोकै सडकमै बसेको दुई दिनपछि उद्धारको सहयोग माग्दै महावाणिज्य दूतावास जेद्धामा पुगेका थिए ।

‘हामी महावाणिज्य दूतावासमा आएर बसेको पनि २० दिन भइसक्यो, अहिलेसम्म पनि उद्धार हुने केही प्रक्रिया अगाडि बढेको थाहा छैन,’ कपिलवस्तुका इन्द्रजीत कोरीले भने, ‘दूतावासले तीन÷चार महिना हामी केही गर्न सक्दैनौं भनेको छ, तिमीहरू आफैं म्यानपावरमा कुरा गर भनेको छ, हामी केही सहयोग हुन्छ भनेर दूतावास आएका हौं, दूतावासले म्यानपावरमा भन भन्छ, त्यसो भए दूतावास किन चाहियो ? हामी दूतावासभित्रै अलपत्र अवस्थामा छौं, खानाचाहिँ पाएका छौं, म्यानपावरले केही वास्ता गर्दैन, अब के गर्ने कहाँ जाने ?’

म्यानपावरले कम्पनीमा लागेको भिसाको पैसा तिरिदिए मात्र कम्पनीले एक्जिट भिसा दिने र त्यसपछि मात्रै आफूहरू नेपाल फर्कन पाउने कोरीले बताए । धेरै समय लाग्छ भनेर दूतावासले भन्ने गरेको उनीहरूको भनाइ छ ।

म्यानपावर कम्पनीले राम्रो कमाइ हुने प्रलोभन दिएर आफूहरूसँग डेढ लाखदेखि २ लाख रुपैयाँसम्म असुली गरेर यहाँ पठाएको उनीहरूले बताए । ‘ऋण काढेर विदेश आइयो, यहाँ धन कमाउने त कता हो कता खाने बस्नेसम्म टुंगो छैन,’ अर्का पीडित अर्घाखाँचीका देवेन्द्र भुसालले भने, ‘आएको दिनदेखि नै पीडामा छांै, होटलले मागेअनुसार म्यानपावरले हामीलाई यहाँ पठाएको पाइएन, हामीलाई क्लिनरका रूपमा यहाँ पठाएको हो, तर होटलमा क्लिनरको आवश्यकता नपरेको भन्दै कम्पनीले २२ दिनसम्म कोठामा थुनेर राख्यो त्यसपछि तिमीहरू हामीलाई चाहिँदैन भनेर सडकमा निकालिदिएपछि दूतावास आएका हौं ।’ दूतावासबाट पनि सहयोग नपाएको उनीहरूले सामूहिक दुखेसो पोखे ।

आफूहरू दूतावासभित्र बसिरहेको भए पनि लामो समय यसरी बस्दा समस्या हुने भन्दै आफूहरूलाई सकुशल स्वदेश फर्कने वातावरण मिलाइदिन र म्यानपावर सञ्चालकलाई कारबाही गरी क्षतिपूर्ति दिलाइदिन उनीहरूले नेपाल सरकार, श्रम मन्त्रालय, वैदेशिक रोजगार विभाग, नेपाली दूतावासलगायत सम्बन्धित निकायलाई आग्रह गरेका छन् ।

अलपत्र पर्नेहरूमा अर्घाखाँचीका देवेन्द्र भुसाल, रौतहटका तस्लिम मिया अन्सारी, जनकपुरका तेजाजु साह, रोल्पाका भरतकुमार मगर, दाङका विजय परियार र विजय कामी, कपिलवस्तुका इन्द्रजीत कोरी, जाजरकोटका राजुराम बुढाक्षेत्री, नवीन परियार, सुनिल परियार र धनुषाका लक्ष्मण ठाकुर रहेका छन् ।

हलेसी ओभरसिजका सञ्चालक राजेशजंग निरौलाले भने पीडितहरू महावाणिज्य दूतावासमा सुरक्षित रहेको भन्दै साता दिनभित्र कम्पनीले काम दिने भनेको भए पनि आफू अस्पतालमा रहेकाले बुझेर खबर गर्ने राजधानीलाई बताए ।

‘अहिलेसम्म दूतावासमै छन्, म्यानपावरले दूतावाससँगको समन्वयमा खाने बस्ने व्यवस्था गरिरहेको छ,’ निरौलाले भने, ‘एक साताभित्र काम दिने सहमति भएको थियो, भोलि दूतावास खोल्ने बित्तिकै के हुँदै छ म बुझ्छु ।’

पीडितहरूले नेपाल फर्काइदिन अनुरोध गरिरहेको भए पनि उनीहरूका परिवारले काम मिल्छ भने काममै लगाइदिनु भनेको उनले बताए । आफूले झुठा बोलेको भए दूतावासमा बुझ्न पनि उनले आग्रह गरे ।

पछिल्लो समय साउदी अरब पुगेका सयौं नेपाली अलपत्र परेको र त्यस विषयमा उनीहरूलाई पठाउने म्यानपावरसँग सम्पर्क गर्दा समस्या समाधान गर्छौं भन्ने गरेको भए पनि नटेर्ने गरेको पाइएको छ । यो खबर आजको राजधानि दैनिकले छापेको छ ।