कोभिड–१९बाट जोगिन गाउँ–गाउँमा ‘माइकिङ’ गर्दै प्रहरी

कञ्चनपुरको भीमदत्तनगरस्थित वडा प्रहरी कार्यालयका प्रमुख प्रहरी निरीक्षक मोहनजङ्ग बुढथापा बिहान पाँच नबज्दै यहाँको खुलामञ्चमा टोलीसहित खटिन्छन् ।

सर्वसाधारणलाई लकडाउनका बेला तरकारीलगायत दैनिक उपभोग्य सामान खरिदका लागि यहाँको खुल्लामञ्चमा व्यवस्थापन गरिएपछि निरीक्षक बुढथापा हाते माइक समाएर कोरोना भाइरस सङ्क्रमण नियन्त्रणका लागि भीडभाड नगर्न आग्रह गर्दै माइकिङ गर्छन् ।

कञ्चनपुरमा स्थानीय प्रशासनले लकडाउन गरेको आज छ दिन भइसकेको छ । लकडाउनको शुरुआती दिनमा बेलुकीतर्फ बजारमा भीडभाड हुन थालेपछि प्रशासनले दैनिक उपभोग्य सामान खरिदका लागि बिहान ५ बजेदेखि ७ बजेसम्मको समयसीमा निर्धारण गरेको छ ।

“सब्जीमण्डीमा भीडभाड धेरै हुन थालेपछि चाप कम गर्न र व्यवस्थित बनाउन मञ्चमा सारिएको हो”, प्रहरी निरीक्षक बुढथापाले भने, “मञ्चमा पनि तरकारी खरिदका लागि आउनेहरुको दूरी राखेर किनमेल गराउन लगाएका छौँ ।”

त्यसका साथै राति अबेरसम्म खटिने वडा प्रहरीको टोलीले बजार क्षेत्र र अस्थायी बिटहरुबाट समेत सर्वसाधारणलाई अनावश्यक हिँडडुल गर्न निषेध गर्दै आएको छ ।

“जिल्ला प्रशासनबाट जारी भएको निर्णय अनुसार हामी सबैतिर खटिएका छौँ”, उनले भने “लकडाउन उल्लघङ्न गर्नेलाई नियन्त्रणमा समेत लिँदैछौँ ।”

वडा प्रहरी कार्यालयले मातहतको युनिटबाट समेत गरेर लकडाउन अटेर गर्ने ३६ मानिस र १०० भन्दाबढी सवारीसाधन नियन्त्रणमा लिएको जनाएको छ ।

इलाका प्रहरी कार्यालय बेलोरीले पनि यहाँको दक्षिण क्षेत्रमा सचेतनामूलक कार्यक्रमसहितको माइकिङ गरिरहेको जनाएको छ ।

“गस्तीका बेला नियमित माइकिङ गरेर घर बाहिर ननिस्कन भनिरहेका छौं”, इप्रका बेलौरीका प्रमुख प्रहरी निरीक्षक रणबहादुर चन्दले भने, “माइकिङका लागि जिङ्गल नै बनाएर गाउँगाउँ गइरहेका छौँ ।”

जिल्ला प्रहरी कार्यालय कञ्चनपुरका प्रवक्ता प्रहरी नायव उपरीक्षक रविन्द्र पौडेलले जिल्लाभरि आठ प्रहरीका गाडीले नियमित कोरोना सङ्क्रमण नियन्त्रणका लागि जनचेतनामूलक सामग्री पस्केर माइकिङ गरिरहेको बताए ।

“हरेक दिन बिहानैदेखि प्रहरीले माइकिङलाई पनि निरन्तरता दिएको छ”, उनले भने “अहिलेसम्म जिल्लामा प्रहरीको सकारात्मक हस्तक्षेप नै छ ।” कञ्चनपुरमा मात्रै लकडाउन अवधिमा ७०० नेपाल प्रहरी खटिएको प्रवक्ता पौडेलले जानकारी दिनुभयो ।

उता सशस्त्र प्रहरी बलले पनि आफ्नो संयन्त्रलाई परिचालन गरेको छ । “हामी सीमामा फसेका नागरिकहरुको उद्धारदेखि नागरिकको घरदैलोसम्म खटिएको अवस्था छ”, सशस्त्र प्रहरी बल ३५ नम्बर गणका गणपति सशस्त्र प्रहरी उपरीक्षक बीरसिंह साहुले भने, “यहाँको सिमापारि अलपत्र रहेका नेपालीहरुको उद्धारसमेत भारतीय सुरक्षा निकायसित निरन्तर समन्वयमार्फत गरिरहेका छौँ ।”

सशस्त्र प्रहरीले जिल्लाभर मोबाइल गस्ती र बस्तीसम्म पुगेर जनचेतना फैलाउन माइकिङसमेत गरिरहेको उनको भनाइ थियो । “सङ्क्रमण नियन्त्रणका लागि आफैँ जोखिममा परेर सुरक्षाकर्मी खटिएर मात्रै हुँदैन”, उनले भने, “यो बेला स्वयं नागरिक पनि जिम्मेवार बन्नुपर्छ ।”

जिल्ला प्रशासन कार्यालय कञ्चनपुरले भने अर्को आदेश नभएसम्मका लागि भन्दै जिल्लाभर तरकारी पसल र मण्डी बन्द गर्ने निर्णय गरेको छ ।

जिल्ला प्रशासन कार्यालय कञ्चनपुरका प्रशासकीय अधिकृत कृष्णानन्द जोशीले जारी गरेको सूचनामा तरकारी पसलहरुमा अनावश्यक भीडभाड हुँदा सङ्क्रमणको जोखिम बढेकाले अर्को आदेश जारी नभएसम्म बन्द गर्ने निर्णय गरिएको जनाइएको छ ।