सेतो खबर
काठमाडौं । त्रिशूली–३ए जलविद्युत् आयोजनाको सुरुङभित्र बाढी र लेदोमा फसेकाहरूको उद्धार अभियान सम्पन्न गरी फर्किएका राष्ट्रिय स्वतन्त्र पार्टी (रास्वपा) का सांसद सागर ढकालले उद्धार कार्य इन्जिनियरिङ दृष्टिकोणले ठूलो सफलता भएको बताएका छन्।
सामाजिक सञ्जालमार्फत आफ्नो अनुभव सार्वजनिक गर्दै ढकालले मानवीय हिसाबले उद्धारमा अपेक्षित पूर्ण सफलता हासिल हुन नसके पनि विशुद्ध नेपाली जनशक्ति र प्राविधिक क्षमताका आधारमा देशले उल्लेखनीय उपलब्धि हासिल गरेको बताएका छन्।
उनका अनुसार उद्धार अभियानका क्रममा फिल्डमा सबै निकायबीच बलियो समन्वय र सहकार्य भएको थियो। तर, उद्धार कार्य भइरहेका बेला सञ्चारमाध्यम तथा सामाजिक सञ्जालमा फैलिएको नकारात्मक प्रचारले केही हदसम्म काममा अवरोध सिर्जना गरेको उनको गुनासो छ।
ढकालले भनेका छन्, “फिल्डमा सबैको सहयोग थियो, सहकार्य थियो तर मिडियामा यति नकारात्मकता फैलाइयो कि काम गर्न केही हदसम्म डिस्टर्ब चाहिँ भयो। सिनियर पार्टी लिडर शुद्ध मिडियाकै लहै–लहैमा लाग्नुपर्यो।”
उद्धार अभियान निकै संवेदनशील अवस्थामा पुगेको उल्लेख गर्दै उनले अझै २४ घण्टा ढिलो भएको भए उद्धार कार्य असफल हुन सक्ने अवस्था रहेको बताएका छन्। “अझै २४ घण्टा ढिलो भएको भए असफल पनि हुन सक्थ्यौँ, भगवान्ले अन्तिममा पुकार सुने, जोगाए,” उनले लेखेका छन्।
फिल्डमा रातदिन खटिने उद्धारकर्मीहरूको मनोबल गिराउने गरी टिप्पणी नगर्न पनि उनले आग्रह गरेका छन्। देश निर्माणका लागि सकारात्मक सोच आवश्यक रहेको भन्दै ढकालले फिल्डमा खटिनेहरूको कामलाई घरभित्र बसेर मजाक नबनाउन अनुरोध गरेका छन्।
उनले उद्धार अभियानमा निरन्तर सहयोग गर्ने नेपाली सेना, सशस्त्र प्रहरी, प्राविधिक टोली, नेपाल विद्युत् प्राधिकरण तथा स्थानीय बासिन्दालगायत सबैप्रति धन्यवाद व्यक्त गरेका छन्।
ढकालले उद्धार अभियानले नेपाली प्राविधिक जनशक्ति र इन्जिनियरिङ क्षमतामाथि विश्वास गर्ने आधार थप बलियो बनाएको दाबीसमेत गरेका छन्।
काठमाडौं । स्पेनले अर्जेन्टिनालाई १–० ले पराजित गर्दै सन् २०२६ को फिफा विश्वकपको उपाधि जितेपछि विश्व फुटबलमा युवा स्टार लामिन यामाल सबैभन्दा बढी चर्चामा रहे। फाइनलमा... विस्तृतमा
