सेतो खबर
काठमाडौं । निजी क्षेत्रको अग्रणी वायुसेवा कम्पनी बुध्द एयरले आफ्नो नयाँ सिरिजको ‘एटीआर ७२–६००’ जहाजमार्फत नियमित व्यावसायिक उडान सुरु गरेको छ ।
शुक्रबार बिहान ८ बजेर ६ मिनेटमा ‘९एन–एओएस’ कलसाइन भएको उक्त जहाजले ६६ जना यात्रु बोकेर काठमाडौंबाट नेपालगञ्जका लागि पहिलो व्यावसायिक उडान भरेको हो ।
कम्पनीले गत जुलाई २५ मा फ्रान्सको तुलुसबाट ल्याएको यो जहाज आवश्यक प्राविधिक तथा नियामकीय प्रक्रिया पूरा गरी सेवामा उतारेको हो ।
पूर्ण ग्लास ककपिट, डिजिटल फ्लाइट म्यानेजमेन्ट र आधुनिक नेभिगेसन प्रणालीले सुसज्जित यस जहाजमा ‘आरएनपी–एआर’ प्रविधि जडान गरिएकाले कम भिजिबिलिटीको अवस्थामा पनि सुरक्षित उडान र अवतरण गर्न सहज हुनेछ ।
वातावरणीय दृष्टिकोणले कम इन्धन खपत गर्ने र कम ध्वनि प्रदूषण गर्ने यो जहाजमा पुराना सिरिजका तुलनामा यात्रु सिट र ओभरहेड बिन फराकिला छन् ।
हाल बुध्द एयरसँग १४ वटा एटीआर–७२–५०० र १ वटा एटीआर–७२–६०० गरी कुल १५ वटा जहाज सञ्चालनमा छन् । कम्पनीले निकट भविष्यमै थप एक एटीआर–७२–६०० जहाज भित्र्याउने तयारी गरेको छ ।
बुध्द एयरले दैनिक १४० भन्दा बढी आन्तरिक उडानका साथै भारतको वाराणसी र कोलकातामा समेत नियमित अन्तर्राष्ट्रिय उडान भर्दै आएको छ ।
चाडपर्वसम्म सस्तो भाडादर र निःशुल्क राहत ढुवानी
यसैबीच, भदौ १० मा रसुवालगायत क्षेत्रमा आएको भीषण बाढीका कारण राजमार्गहरू अवरुद्ध भएपछि कम्पनीले दशैं, तिहार र छठपर्वसम्म न्यूनतम तथा सस्तो भाडादरमै उडान सञ्चालन गर्ने निर्णय गरेको छ ।
बुध्द एयरका कार्यकारी अध्यक्ष वीरेन्द्र बहादुर बस्नेतले प्राकृतिक विपत्तिका बेला हवाई सेवामार्फत यात्रुलाई सहज विकल्प दिनु कम्पनीको दायित्व भएको बताउँदै नाफा–घाटाभन्दा नागरिकको सेवालाई प्राथमिकता दिएको बताएका छन् ।
पछिल्लो सात महिनामा हवाई इन्धनको मूल्य ९६ प्रतिशतले बढेर प्रतिलिटर २४९ रुपैयाँ पुग्दा पनि कम्पनीले आर्थिक भार आफैं बेहोरेर काठमाडौं–भैरहवाको भाडादर १४ प्रतिशत मात्र बढाएर ६ हजार ५ सय रुपैयाँ कायम राखेको छ ।
साथै, बाढीपहिरो प्रभावित क्षेत्रका लागि कम्पनीले देशका विभिन्न जिल्लाबाट हालसम्म ७ हजार ३ सय २२ केजी राहत सामग्री निःशुल्क ढुवानी गरिसकेको छ ।
काठमाडौं । स्पेनले अर्जेन्टिनालाई १–० ले पराजित गर्दै सन् २०२६ को फिफा विश्वकपको उपाधि जितेपछि विश्व फुटबलमा युवा स्टार लामिन यामाल सबैभन्दा बढी चर्चामा रहे। फाइनलमा... विस्तृतमा
