सेतो खबर
काठमाडौं । सत्तारुढ राष्ट्रिय स्वतन्त्र पार्टी (रास्वपा)का सांसद पारसमणि गेलालले आफ्नै पार्टीका मन्त्रीहरूको कार्यशैलीप्रति प्रश्न उठाएका छन्।
सोमबार प्रतिनिधिसभाको शून्य समयमा बोल्दै सांसद गेलालले जनताले आधारभूत सेवा पाउनसमेत समस्या भोगिरहेका बेला मन्त्रीहरू भने अनावश्यक भ्रमण र प्रचारमा केन्द्रित भएको आरोप लगाए।
उनले मन्त्रीहरूलाई मन्त्रालयको काम छाडेर देश घुम्नुभन्दा नीति निर्माण र समस्या समाधानमा ध्यान दिन आग्रह गरे।
‘माननीय मन्त्रीज्यूहरूलाई प्रश्न छ, तपाईंहरूलाई देश घुम्ने रहर हो कि समस्या समाधान गर्ने हुटहुटी ? बिदामा घुम्न गएजस्तो गर्नुभन्दा मन्त्रालयमा बस्नुस्। नीति बनाउनुस्, निर्णय गर्नुस्, कर्मचारीको मनोबल उच्च बनाउनुस्,’ उनले भने।
गेलालले देशका १६५ वटै निर्वाचन क्षेत्रका समस्या र समाधानका उपाय सम्बन्धित क्षेत्रका सांसदहरूले प्रस्तुत गर्न सक्ने भन्दै राज्यको ढुकुटीबाट ठूलो संख्यामा सल्लाहकार नियुक्त गर्न आवश्यक नरहेको बताए।
जनताले ग्यास, मल, सञ्चार सेवा, विद्युत् तथा आधारभूत स्वास्थ्य सेवाका लागि समस्या भोगिरहेको उल्लेख गर्दै उनले मन्त्रीहरूको व्यवहार जनताको अवस्थासँग मेल खान नसकेको टिप्पणी गरे।
‘मन्त्रीलाई सामान्य रुघा लाग्दा हेलिकप्टर उपलब्ध हुन्छ। तर जनता मर्न लाग्दा अस्पताल पुग्ने साधन हुँदैन। अस्पतालमा डाक्टर हुँदैनन्,’ उनले भने।
उनको यो भनाइ पूर्वाधारमन्त्री सुनील लम्साल स्वास्थ्यमा समस्या आएपछि हेलिकप्टरमार्फत धनगढी हुँदै काठमाडौं ल्याइएको घटनाप्रति लक्षित थियो। लम्साल सुदूरपश्चिमका विभिन्न जिल्लामा राजमार्ग तथा पूर्वाधारको अवस्थाको निरीक्षणका क्रममा बैतडी पुगेका थिए। स्वास्थ्यमा समस्या आएपछि उनलाई उपचारका लागि काठमाडौं ल्याइएको थियो। उनी हाल डिस्चार्ज भइसकेका छन्।
सांसद गेलालले मन्त्रीहरू जिल्ला पुगेर भिडियो बनाएर सामाजिक सञ्जालमा सार्वजनिक गर्दैमा जनता खुसी नहुने बताए।
‘मन्त्रीज्यूहरू, तपाईंहरूका भिडियो र प्रचारले जनता खुसी हुँदैनन्। जनताको घरघरमा मन्त्री पुग्ने होइन, सरकारका कारण समस्या समाधान भएको अनुभूति पुग्नुपर्छ,’ उनले भने।
उनले मन्त्रीहरूलाई देश घुम्नुभन्दा देशका वास्तविक समस्या समाधान गर्नतर्फ केन्द्रित हुन आग्रह गरे।
‘देश नघुम्नुस्, देशको समस्या समाधान गर्नुस्,’ गेलालले भने।
काठमाडौं । स्पेनले अर्जेन्टिनालाई १–० ले पराजित गर्दै सन् २०२६ को फिफा विश्वकपको उपाधि जितेपछि विश्व फुटबलमा युवा स्टार लामिन यामाल सबैभन्दा बढी चर्चामा रहे। फाइनलमा... विस्तृतमा
