सेतो खबर
काठमाडौं । पूर्वराजा ज्ञानेन्द्र शाहले देशमा धार्मिक, सांस्कृतिक तथा सामाजिक सद्भाव कायम राख्न सबै नेपालीलाई संयमता अपनाउन आग्रह गरेका छन्।
बिहीबार जारी गरेको सद्भाव सन्देशमा उनले नेपाल निर्माणको सुरुदेखि नै नेपालीहरू मिलिजुली, हाँसीखुसी र आपसी प्रेमका साथ बस्दै आएको उल्लेख गर्दै नेपालको बहुजातीय, बहुभाषिक तथा बहुधार्मिक विशेषतालाई देशको पहिचान र गौरवका रूपमा संरक्षण गर्नुपर्ने बताएका छन्।
पूर्वराजा शाहले नेपाली समाजमा रहेका विविध धर्म, संस्कृति, रीतिरिवाज तथा आस्थाप्रति सम्मान कायम रहनुपर्नेमा जोड दिँदै यिनै विशेषताका कारण नेपाल विश्वमा सम्मानित रहेको उल्लेख गरेका छन्। उनले नेपालको मौलिक पहिचानमा कुनै पनि प्रकारको खलल पुग्न नहुने बताएका छन्।
उनले केही दिनअघि सुनसरी जिल्लाका केही गाउँबस्तीमा भएको आपसी द्वन्द्व र विवादका कारण जनधनको क्षति भएको तथा त्यसको प्रभाव कोशी क्षेत्र हुँदै तराईका विभिन्न स्थानसम्म फैलिएकोप्रति दुःख व्यक्त गरेका छन्।
पूर्वराजा शाहले नेपाललाई सामाजिक सद्भाव र सहिष्णुताको देशका रूपमा चिनाउँदै यस्ता अवाञ्छित घटना मुलुकको मौलिक मूल्य, मान्यता र सामाजिक एकताको भावना विपरीत रहेको बताएका छन्। देशका जुनसुकै भूभागमा बसोबास गर्ने सबै नेपालीबीच आपसी मेलमिलाप, सद्भाव र सहकार्य कायम राख्न उनले आग्रह गरेका छन्।
सन्देशको अन्त्यमा उनले वर्तमान परिस्थितिमा राष्ट्रिय एकता र सामाजिक सद्भाव नै देशको प्रमुख आवश्यकता भएको उल्लेख गर्दै सबै पक्षलाई संयमता अपनाई शान्तिपूर्ण वातावरण कायम राख्न आह्वान गरेका छन्।
काठमाडौं । स्पेनले अर्जेन्टिनालाई १–० ले पराजित गर्दै सन् २०२६ को फिफा विश्वकपको उपाधि जितेपछि विश्व फुटबलमा युवा स्टार लामिन यामाल सबैभन्दा बढी चर्चामा रहे। फाइनलमा... विस्तृतमा
