सेतो खबर
काठमाडौं । वातावरण संरक्षण र जलवायु परिवर्तनका चुनौतीहरूको सामना गर्ने उद्देश्यसहित लक्ष्मी सनराइज बैंकले आफ्नो प्रमुख वातावरणीय अभियान ‘The Goal is Green’ कार्यान्वयनका लागि WWF नेपाल र काम्दी सामुदायिक वन समन्वय समिति (Kamdi CFCC) सँग सहकार्य गरेको छ।
यस अभियानअन्तर्गत बैंकले FIFA World Cup 2026 मा भएको प्रत्येक गोल बराबर एक रैथाने बिरुवा रोप्ने प्रतिबद्धता जनाएको थियो। विश्वकप सम्पन्न भएसँगै प्रतियोगिताभर भएका ३३३ गोल बराबर ३३३ वटा रैथाने बिरुवा रोप्ने प्रतिबद्धता बैंकले पूरा गर्ने जनाएको छ।
बैंकका अनुसार विश्वकै सबैभन्दा लोकप्रिय खेल प्रतियोगितालाई वातावरण संरक्षणसँग जोड्दै नेपालमा दीर्घकालीन सकारात्मक प्रभाव सिर्जना गर्ने उद्देश्यले यो अभियान सञ्चालन गरिएको हो। ‘The Goal is Green’ अभियानले विश्वव्यापी खेलकुदको उत्साहलाई स्थानीय स्तरको जलवायु तथा वातावरणीय संरक्षणसँग जोड्ने बैंकको दिगोपनप्रतिको सोचलाई प्रतिबिम्बित गर्ने जनाएको छ।
सहकार्यअन्तर्गत WWF नेपालले अभियान कार्यान्वयनका लागि आवश्यक प्राविधिक सहयोग उपलब्ध गराउनेछ। संरक्षण क्षेत्रमा रहेको अनुभवका आधारमा WWF नेपालले लक्ष्मी सनराइज बैंकलाई आफ्नो स्थानीय संरक्षण साझेदार काम्दी सामुदायिक वन समन्वय समिति (Kamdi CFCC) सँग जोडेको हो।
काम्दी CFCC ले उपयुक्त स्थानमा स्थानीय जैविक विविधताअनुकूल रैथाने प्रजातिका बिरुवा रोप्ने, संरक्षण गर्ने तथा दीर्घकालीन व्यवस्थापन गर्नेछ। WWF नेपालले भने बिरुवाको प्रजाति छनोट, रोपाइँका लागि उपयुक्त क्षेत्रको पहिचान तथा पारिस्थितिकीय पुनःस्थापनासम्बन्धी प्राविधिक मार्गदर्शन प्रदान गर्नेछ।
लक्ष्मी सनराइज बैंकका प्रमुख कार्यकारी अधिकृत (सीईओ) अजय शाहले दिगोपन बैंकको रणनीतिक प्राथमिकतामात्र नभई दीर्घकालीन मूल्य सिर्जनाको आधार भएको बताए। उनले ‘The Goal is Green’ अभियानले खेलप्रतिको उत्साहलाई जलवायु संरक्षणको सार्थक अभियानमा रूपान्तरण गर्न सकिने विश्वासलाई व्यवहारमा उतारेको उल्लेख गरे।
उनका अनुसार विश्वकपमा भएको प्रत्येक गोल बराबर एक बिरुवा रोप्ने प्रतिबद्धतामार्फत बैंकले नेपालको हरित भविष्य निर्माणमा योगदान पुर्याउने लक्ष्य लिएको छ। WWF नेपालको प्राविधिक विशेषज्ञता र समुदायसँगको अनुभवले अभियानलाई अझ प्रभावकारी र दिगो बनाउने उनको विश्वास छ।
WWF नेपालका कन्ट्री रिप्रेजेन्टेटिभ डा. घनश्याम गुरुङले वन पुनःस्थापना भनेको केवल रूख रोप्नु मात्र नभई सही स्थानमा सही रैथाने प्रजातिका बिरुवा रोपेर स्थानीय समुदायसँगको सहकार्यमा संरक्षण गर्नु पनि उत्तिकै महत्त्वपूर्ण रहेको बताए। निजी क्षेत्रको लगानीलाई समुदायमा आधारित संरक्षणसँग जोड्दा प्रकृति, समुदाय र भावी पुस्ताका लागि दीर्घकालीन लाभ सिर्जना हुने उनले उल्लेख गरे।
काम्दी सामुदायिक वन समन्वय समिति (Kamdi CFCC) का अध्यक्ष महेन्द्र शाहीले यस सहकार्यले जैविक मार्ग (Corridor) पुनःस्थापनासम्बन्धी प्रयासलाई थप बल पुग्ने र स्थानीय समुदायले दीर्घकालीन लाभ प्राप्त गर्ने विश्वास व्यक्त गरे।
बैंकका अनुसार ‘The Goal is Green’ अभियानमार्फत दिगोपनलाई वित्तीय सेवा र उत्पादनमा मात्र सीमित नराखी सामाजिक तथा वातावरणीय उत्तरदायित्वसँग प्रत्यक्ष रूपमा जोड्ने प्रयास गरिएको छ। साथै, खेलकुदको विश्वव्यापी उत्साहलाई समुदायमा आधारित वातावरणीय पुनःस्थापनासँग जोडेर ग्राहक, व्यवसाय र समुदायलाई जलवायु संरक्षण अभियानमा सहभागी गराउने तथा नेपालको हरित भविष्य निर्माणमा योगदान पुर्याउने लक्ष्य राखिएको छ।
काठमाडौं । भावी प्रधानन्यायाधीश नियुक्तिका लागि सिफारिस गर्ने उद्देश्यले आज संवैधानिक परिषद्को बैठक बस्दैछ। परिषद्का अध्यक्ष तथा प्रधानमन्त्री बालेन्द्र शाह... विस्तृतमा
