नेप्से ३०.०९ अंकले घट्यो, कारोबार रकम ४ अर्ब ८२ करोड रुपैयाँ नाघ्यो

काठमाडौं । नेपाल स्टक एक्सचेन्ज (नेप्से) परिसूचक बुधबार ३०.०९ अंकले घट्दै २६२१.५९ विन्दुमा बन्द भएको छ। अघिल्लो कारोबार दिनको तुलनामा नेप्से १.१३ प्रतिशतले घटेको हो।

दिनभर उतारचढाव देखिएको बजार अन्त्यमा दोहोरो अंकले ओरालो लागेको हो। यसअघि मंगलबार नेप्से २४.५७ अंकले बढेको थियो भने सोमबार २६.२९ अंकले घटेको थियो।

बजार परिसूचक घटे पनि कारोबार रकम भने बढेको छ। बुधबार ३६२ कम्पनीका ८४ लाख ६३ हजार १५ कित्ता सेयर ७७ हजार ६२७ पटक किनबेच हुँदा कुल ४ अर्ब ८२ करोड ६० लाख ८४ हजार ८२५ रुपैयाँ बराबरको कारोबार भएको छ। मंगलबार ४ अर्ब ४० करोड ७ लाख रुपैयाँ र सोमबार ३ अर्ब ५५ करोड ७९ लाख रुपैयाँ बराबरको कारोबार भएको थियो।

आज कारोबारमा आएका कम्पनीमध्ये २५ कम्पनीको सेयर मूल्य बढ्दा २४७ कम्पनीको मूल्य घट्यो भने पाँच कम्पनीको सेयर मूल्य स्थिर रह्यो। १३ उपसमूहमध्ये म्युचुअल फन्ड समूह मात्र हरियो रहँदा बाँकी १२ उपसमूहको परिसूचक घटेको छ।

सबैभन्दा धेरै जलविद्युत् समूह १.७० प्रतिशतले घट्यो। त्यसपछि विकास बैंक १.४६ प्रतिशत, फाइनान्स १.४३ प्रतिशत, होटल तथा पर्यटन १.२९ प्रतिशत, वाणिज्य बैंक १.१८ प्रतिशत, उत्पादन तथा प्रशोधन १.१३ प्रतिशत, निर्जीवन बीमा १.०७ प्रतिशत, जीवन बीमा ०.८४ प्रतिशत, लघुवित्त ०.८१ प्रतिशत, लगानी ०.३९ प्रतिशत, व्यापार ०.२१ प्रतिशत र अन्य समूह १.१५ प्रतिशतले ओरालो लागे। म्युचुअल फन्ड समूहको सूचक भने ०.११ प्रतिशतले बढेको छ।

व्यक्तिगत कम्पनीतर्फ एनएमबी डिबेन्चरका लगानीकर्ताले सबैभन्दा बढी ५.५२ प्रतिशत प्रतिफल कमाए भने कर्पोरेट डेभलपमेन्ट बैंक लिमिटेडका लगानीकर्ताले १३.४१ प्रतिशत सेयर मूल्य गुमाए।

कारोबार रकमका आधारमा केबीएल डिबेन्चर शीर्ष स्थानमा रह्यो। यस डिबेन्चरको ६२ करोड ३९ लाख १२ हजार ४७२ रुपैयाँ बराबरको कारोबार भएको छ। कारोबार भएको सेयर संख्याका आधारमा पनि यही डिबेन्चर अगाडि रहँदै चार लाख ९७ हजार ४१ कित्ता सेयर किनबेच भएको छ। बुधबार यसको अन्तिम कारोबार मूल्य प्रतिकित्ता १,२९० रुपैयाँ कायम भएको छ।