सिटिजन लाइफ इन्स्योरेन्स कम्पनीको एमडीआरटी २०२६ सम्मान तथा प्रशिक्षण कार्यक्रम सम्पन्न

पोखरा। सिटिजन लाइफ इन्स्योरेन्स कम्पनीले एमडीआरटी २०२६ (Million Dollar Round Table) सम्मान तथा प्रशिक्षण कार्यक्रम भव्य रूपमा सम्पन्न गरेको छ। कार्यक्रम २०८२ साल फागुन ५ गतेदेखि ७ गतेसम्म होटल पोखरा ग्राण्डमा दुई रात तीन दिनसम्म सञ्चालन गरिएको थियो।

कम्पनीका अनुसार कार्यक्रममा कुल ७० जना सिटिजन लिडरहरूलाई सम्मान गरिएको थियो। जसमध्ये ६७ जना एमडीआरटी, २ जना सिओटी (Court of the Table – COT) तथा १ जना टिओटी (Top of the Table – TOT) क्वालिफायर रहेका थिए। साथै सिनियर एजेन्सी म्यानेजर, उत्कृष्ट कार्यसम्पादनका आधारमा छनोट भएका शाखा प्रमुख तथा क्षेत्रीय प्रमुखहरूको पनि उल्लेखनीय सहभागिता रहेको थियो।

उत्कृष्ट कार्यसम्पादन गर्ने लिडरहरूलाई सम्मान गर्नुका साथै आगामी व्यवसायिक लक्ष्य र रणनीतिबारे स्पष्ट मार्गदर्शन दिनु कार्यक्रमको मुख्य उद्देश्य रहेको कम्पनीले जनाएको छ। कार्यक्रममा “The Secret of Progressive Life” विषयमा प्रख्यात सेल्स कोच तथा मोटिभेशनल स्पीकर डा. रबिन कटवालले विशेष प्रशिक्षण सत्र सञ्चालन गर्नुभएको थियो। उक्त सत्रले सहभागीहरूलाई व्यक्तिगत तथा व्यवसायिक विकासका लागि प्रेरणा दिएको बताइएको छ।

कार्यक्रममा कम्पनीका प्रशिक्षण विभाग प्रमुख कुबेर पाठक, प्रमुख वित्तीय अधिकृत   गोपाल पंगेनी, प्रमुख बजार व्यवस्थापन अधिकृत  भुषण रिमाल तथा प्रमुख कार्यकारी अधिकृत  पोषक राज पौडेलले आ–आफ्नो प्रस्तुति तथा मार्गदर्शन प्रदान गर्नुभएको थियो।

त्यसैगरी कम्पनीका ब्राण्ड एम्बेसडर मदनकृष्ण श्रेष्ठ र हरिवंश आचार्यको विशेष उपस्थिति रहेको थियो। उहाँहरूले हाँस्य–व्यंग्यमार्फत सहभागीहरूलाई उत्साहित बनाउनुका साथै MDRT क्वालिफायरहरूलाई सम्मान गर्नुभएको थियो।

समापन समारोहमा प्रमुख कार्यकारी अधिकृत पोषक राज पौडेलले कम्पनीको निरन्तर प्रगति सिटिजन लिडरहरूको समर्पण, प्रतिबद्धता र उत्कृष्ट कार्यसम्पादनकै परिणाम भएको उल्लेख गर्दै आगामी दिनमा अझ उच्च उपलब्धि हासिल गर्ने विश्वास व्यक्त गर्नुभयो।

कम्पनीले समग्र कार्यक्रम भव्य, प्रभावकारी तथा सफल भएको जनाएको छ। यस्ता कार्यक्रमले लिडरहरूलाई थप उत्प्रेरणा प्रदान गर्दै व्यवसाय विस्तार र व्यक्तिगत क्षमताको अभिवृद्धिमा महत्वपूर्ण योगदान पुर्‍याउने विश्वास लिइएको छ।