फेरी अण्डाको मुल्य बढ्यो, क्रेटको कति पुग्यो ?

चितवन । नेपाल लेयर्स सङ्घ ले अण्डाको बढ्दो उत्पादन लागतलाई मध्यनजर गर्दै आजदेखि लागू हुनेगरी नयाँ मूल्य सार्वजनिक गरेको छ। सङ्घले ठूलो अण्डाको मूल्य प्रतिक्रेट रु ४२५ र मझौला अण्डाको मूल्य प्रतिक्रेट रु ३७५ निर्धारण गरेको जनाएको छ।

सङ्घका पदाधिकारीका अनुसार पछिल्लो समय दाना, चल्ला, औषधि, विद्युत् तथा ढुवानी खर्चमा उल्लेख्य वृद्धि भएपछि अण्डा उत्पादन लागत बढेको हो। हाल प्रतिगोटा अण्डाको लागत १९ रुपैयाँ १२ पैसा पुगेको सङ्घले जनाएको छ। यसअघिको मूल्यमा बिक्री गर्दा किसानहरू घाटामा जान थालेपछि मूल्य समायोजन गर्न बाध्य भएको सङ्घको भनाइ छ।

लेयर्स किसानहरूले बैंक ब्याजदर, श्रम खर्च र कच्चा पदार्थको मूल्य वृद्धिले व्यवसाय धान्न कठिन बन्दै गएको गुनासो गरेका छन्। “उत्पादन लागतअनुसार मूल्य नपाउँदा धेरै किसान विस्थापित हुने अवस्थामा पुगेका छन्,” एक किसानले बताए।

नयाँ मूल्य लागू भएसँगै बजारमा अण्डाको खुद्रा मूल्यसमेत बढ्ने सम्भावना रहेको छ। खुद्रा व्यापारीहरूले ढुवानी र भण्डारण खर्च जोडेर मूल्य निर्धारण गर्ने भएकाले उपभोक्ताले केही महँगो मूल्य तिर्नुपर्ने देखिएको छ।

अण्डा दैनिक उपभोग्य वस्तु भएकाले मूल्य वृद्धिले उपभोक्तामा प्रत्यक्ष प्रभाव पार्ने अनुमान गरिएको छ। तर उत्पादन लागतको चाप कम नभएसम्म मूल्य समायोजन अनिवार्य रहेको सङ्घले स्पष्ट पारेको छ।