नेशनल लाईफ इन्स्योरेन्स कम्पनी लिमिटेड को सिइओ क्लब सदस्य सम्मान कार्यक्रम जनकपुरमा सम्पन्न

जनकपुर । नेशनल लाईफ इन्स्योरेन्स कम्पनी लिमिटेड ले जनकपुरस्थित मिथिला यात्री मा कम्पनीका प्रमुख कार्यकारी अधिकृतको सभापतित्वमा सिइओ क्लब सदस्य सम्मान कार्यक्रम सम्पन्न गरेको छ।

आर्थिक वर्ष २०८१/८२ मा तोकिएको बीमाशुल्क संकलन गरी मधेश प्रदेशबाट योग्य भएका ७७ जना अभिकर्तासहित विभागीय प्रमुख, प्रदेश प्रमुख तथा मधेश प्रदेशअन्तर्गतका शाखा कार्यालयका प्रमुखहरूको सहभागितामा कार्यक्रम आयोजना गरिएको थियो। उक्त अवसरमा सिइओ क्लब सदस्य बन्न सफल अभिकर्ताहरूलाई सम्मान गरिएको हो।

कार्यक्रमको शुभारम्भ कम्पनीका प्रमुख कार्यकारी अधिकृत सुरेश प्रसाद खत्री ले पानसमा दीप प्रज्वलन गरी गर्नुभएको थियो। कार्यक्रममा मधेश प्रदेशबाट सिइओ क्लब सदस्य बन्न सफल अभिकर्ताहरूलाई सदस्यता वितरण तथा सम्मान गरिएको थियो। साथै नेशनल रत्न र नेशनल स्टार विजेता अभिकर्ताहरूलाई कम्पनीको लोगो अंकित चाँदीको मेडल, प्रमाणपत्र तथा खादा प्रदान गरी सम्मान गरिएको थियो।

त्यसैगरी सो प्रदेशबाट आफ्नो कोड र सञ्जालमा प्रथम, द्वितीय र तृतीय स्थान हासिल गर्ने उत्कृष्ट अभिकर्ताहरूलाई विशेष सम्मान तथा पुरस्कार प्रदान गरिएको थियो।

समारोहमा प्रमुख कार्यकारी अधिकृत खत्रीले कम्पनीलाई अग्रस्थानमा पुर्‍याउन महत्वपूर्ण भूमिका खेल्ने अभिकर्ता समूहलाई उच्च प्राथमिकतामा राखिएको उल्लेख गर्दै सबै तहका अभिकर्ताका लागि अभिकर्ता–मैत्री योजना ल्याउने क्रममा वार्षिक रूपमा प्रदेशस्तरीय कार्यक्रम सञ्चालन गर्ने अवधारणाअनुसार सिइओ क्लबको सुरुआत गरिएको जानकारी दिनुभयो। उहाँका अनुसार यस अवधारणाअन्तर्गत देशभरबाट १६०० भन्दा बढी अभिकर्ता छनोट हुनुले योजना अत्यन्त सफल भएको छ।

कार्यक्रममा चर्चित अन्तर्राष्ट्रिय प्रशिक्षक सैयद अफ्जल अहमद ले व्यवसायिक दक्षता अभिवृद्धि सम्बन्धी विभिन्न उदाहरणसहित प्रशिक्षण दिनुभएको थियो।

यसै क्रममा जनकपुर शाखाका लक्ष्मण पण्डित तथा लाहान शाखाका श्याम चन्द्र राईले आफ्नो व्यवसायिक अनुभव साझा गरेका थिए। सहभागी अभिकर्ताहरूले प्रमुख कार्यकारी अधिकृतबाट आफ्नै प्रदेशमा सम्मान ग्रहण गर्न पाउँदा मेहनतको कदर भएको महसुस भएको उल्लेख गर्दै उत्कृष्ट तालिमको व्यवस्था गरेकोमा कम्पनीप्रति आभार व्यक्त गरेका थिए।