सेतो खबर
काठमाडौं । नेपाल प्रहरीका पूर्वडीआईजी रमेश खरेलले प्रधानमन्त्री बालेन्द्र शाह (बालेन) र उनको टिमको कार्यशैलीप्रति असन्तुष्टि जनाउँदै राष्ट्रिय स्वतन्त्र पार्टी (रास्वपा) का सभापति रवि लामिछानेलाई सरकारमा हस्तक्षेप गर्न आग्रह गरेका छन् ।
खरेलले बिचौलिया परिचालन गरेर राज्यका शक्तिशाली संरचनालाई कमजोर बनाउने प्रयास भइरहेको आरोप लगाउँदै रवि आफैँले सरकारको नेतृत्व सम्हाल्नुपर्ने अवस्था आएको टिप्पणी गरेका छन् ।
सामाजिक सञ्जाल फेसबुकमा लामो स्टाटस लेख्दै उनले दुई तिहाइको जनादेश र जेनजी आन्दोलनपछिको जनसमर्थनको सरकारले सही सदुपयोग गर्न नसकेको आरोप लगाएका छन् ।
उनले लेखेका छन्, ‘रविजी, पार्टी मात्रै होइन, यो गिरोहलाई हटाएर सरकार पनि आफैँ सम्हाल्नुपर्ने अवस्था आइसकेको छ । दुई तिहाइको जनादेश र जेनजी विद्रोहपछिको जनसमर्थनको हुर्मत कसरी लिइँदैछ भन्ने विषय अहिलेका बहालवाला प्रधानमन्त्री बालेन र उनको लगान टिमले स्पष्ट पारिदिएको छ ।’
खरेलले नेपाली कांग्रेसका सभापति गगन थापालाई समेत लक्षित गर्दै उनलाई फसाउने षड्यन्त्र भइरहेको दाबी गरेका छन् । सरकारलाई प्रश्न गरेकै आधारमा थापाविरुद्ध गतिविधि भइरहेको भन्दै उनले प्रतिपक्षको भूमिकामाथि प्रश्न उठाएका छन् ।
उनका अनुसार लोकतन्त्रमा सरकारलाई खबरदारी गर्ने बलियो प्रतिपक्ष आवश्यक हुन्छ । उनले सरकार शक्तिशाली हुनु अस्वाभाविक नभए पनि सरकारका गलत काममाथि प्रश्न उठाउने प्रतिपक्षको आवाज कमजोर बनाउन नहुने बताएका छन् ।
खरेलले गगन थापाले कांग्रेसको आधिकारिकता प्राप्त गर्न १८ करोड रुपैयाँ खर्च गरेको भन्ने आरोप तथा सर्वोच्च अदालतका न्यायाधीशको नाम जोडेर भइरहेको प्रचारप्रति पनि चिन्ता व्यक्त गरेका छन् ।
राजनीतिक विवादको निरूपण सामाजिक सञ्जालको भीड र डिजिटल ट्रायलबाट नभई प्रमाण तथा कानुनी प्रक्रियाबाट हुनुपर्ने उनको भनाइ छ । कसैलाई सामाजिक सञ्जालकै आधारमा दोषी ठहर गर्न नहुने उनले बताएका छन् ।
गत निर्वाचनमा खरेलले गगन थापा नेतृत्वको नेपाली कांग्रेसको पक्षमा मत मागेका थिए । पछिल्लो अभिव्यक्तिमा उनले प्रधानमन्त्री बालेनको कार्यशैलीप्रति असन्तुष्टि जनाउँदै आफ्नो स्टाटसको अन्त्यमा ‘बालेन, दिस इज नट डन’ लेखेका छन् ।
काठमाडौं । स्पेनले अर्जेन्टिनालाई १–० ले पराजित गर्दै सन् २०२६ को फिफा विश्वकपको उपाधि जितेपछि विश्व फुटबलमा युवा स्टार लामिन यामाल सबैभन्दा बढी चर्चामा रहे। फाइनलमा... विस्तृतमा
