सेतो खबर
काठमाडौं । काठमाडौं उपत्यकामा आगामी तीन दिन भारी वर्षा हुन सक्ने सम्भावना रहेकाले जिल्ला प्रशासन कार्यालय काठमाडौंले नदी किनार तथा डुबानको जोखिममा रहेका क्षेत्रका बासिन्दालाई उच्च सतर्कता अपनाउन आग्रह गरेको छ।
जल तथा मौसम विज्ञान विभागको पछिल्लो मौसम पूर्वानुमानलाई आधार बनाउँदै प्रशासनले शुक्रबारदेखि तीन दिनसम्म उपत्यकाका विभिन्न स्थानमा भारी वर्षा हुन सक्ने जनाएको हो। देशभर पनि आगामी तीन दिन वर्षाको सम्भावना रहेको र बागमती प्रदेशका केही स्थानमा भारीदेखि धेरै भारी वर्षा हुन सक्ने मौसम पूर्वानुमान महाशाखाले जनाएको छ।
जिल्ला प्रशासन कार्यालय काठमाडौंका प्रशासकीय अधिकृत तारानाथ फुल्लेलले बिहीबार जारी गरेको सूचनामा सम्भावित विपद्बाट जोगिन आवश्यक पूर्वतयारी तथा सावधानी अपनाउन सर्वसाधारणलाई अनुरोध गरिएको छ।
भारी वर्षाका कारण खोला, खोल्सी तथा नदी–नालामा पानीको सतह बढ्न सक्ने भएकाले नदी किनार तथा डुबानको जोखिम रहेका क्षेत्रमा बसोबास गर्ने नागरिकलाई विशेष सावधानी अपनाउन प्रशासनले आग्रह गरेको छ।
बाढी वा डुबानको जोखिम देखिएमा तत्काल सुरक्षित तथा उच्च स्थानमा जान, जोखिमयुक्त क्षेत्रमा अनावश्यक आवतजावत नगर्न तथा मौसमसम्बन्धी आधिकारिक सूचना नियमित रूपमा हेर्न प्रशासनले अनुरोध गरेको छ।
यसैबीच, काठमाडौं महानगरपालिकाले पनि नियमित वर्षाका कारण सम्भावित बाढी तथा डुबानको जोखिमलाई ध्यानमा राख्दै जोखिमयुक्त स्थान र विद्यालयमा निगरानी बढाएको जनाएको छ। महानगरले पूर्वसूचना, उद्धार सामग्री, जनशक्ति परिचालन तथा सुरक्षित स्थानको व्यवस्थापनमा तयारी अघि बढाएको जनाएको छ।
सम्भावित विपद्का बेला उद्धार वा अन्य सहयोग आवश्यक परेमा २४ घण्टा सञ्चालन हुने टोल फ्री विपद् हेल्पलाइन नम्बर १२३४ मा सम्पर्क गर्न सकिने गृह मन्त्रालयले जनाएको छ।
काठमाडौं । स्पेनले अर्जेन्टिनालाई १–० ले पराजित गर्दै सन् २०२६ को फिफा विश्वकपको उपाधि जितेपछि विश्व फुटबलमा युवा स्टार लामिन यामाल सबैभन्दा बढी चर्चामा रहे। फाइनलमा... विस्तृतमा
