सेतो खबर
नेपाल प्रहरीका प्रहरी महानिरीक्षक (आईजीपी) दानबहादुर कार्कीले राजधानीको ट्राफिक व्यवस्थापनलाई प्रविधिमैत्री र वैज्ञानिक बनाउन एआई–सक्षम सीसीटीभीसहित आधुनिक प्रविधिको प्रयोग बढाउनुपर्ने बताएका छन्।
काठमाडौं महानगर प्रहरी बलको ३४औँ वार्षिकोत्सवमा आइतबार बोल्दै आईजीपी कार्कीले सडकमा जोखिम मोलेर ट्राफिक प्रहरीले हात हल्लाउँदै सवारी व्यवस्थापन गर्नुपर्ने अवस्थाको अन्त्य हुनुपर्ने बताए।
उनले व्यवस्थित बस स्टप, बसपार्क, पार्किङ स्टेसन तथा वैज्ञानिक पार्किङ प्रणाली विकाससँगै ट्राफिक र फुटपाथ व्यवस्थापनलाई प्रभावकारी बनाउनुपर्नेमा जोड दिए।
कार्कीले आपत्कालीन उद्धार तथा प्रतिकार्य प्रणालीलाई थप प्रभावकारी बनाउन काठमाडौं महानगरपालिका र सुरक्षा निकायबीच समन्वय तथा सहकार्य बढाउनुपर्ने बताए।
उनका अनुसार स्थानीय तहले प्रहरीलाई आवश्यक जग्गा तथा भवन उपलब्ध गराउने, प्रहरी कार्यालय निर्माण तथा मर्मतमा सहयोग गर्ने, सवारीसाधन र विपद् उद्धार सामग्री उपलब्ध गराउने तथा सीसीटीभी जडान र विस्तारमा सहकार्य गर्नुपर्नेछ।
प्रविधि र स्थानीय तहसँगको सहकार्य बढाउँदै सडकमा प्रहरी उभ्याएर होइन, वैज्ञानिक प्रणालीमार्फत ट्राफिक व्यवस्थापन गर्ने अवस्था सिर्जना गर्नुपर्नेमा आईजीपी कार्कीले जोड दिए।
काठमाडौं । स्पेनले अर्जेन्टिनालाई १–० ले पराजित गर्दै सन् २०२६ को फिफा विश्वकपको उपाधि जितेपछि विश्व फुटबलमा युवा स्टार लामिन यामाल सबैभन्दा बढी चर्चामा रहे। फाइनलमा... विस्तृतमा
