सेतो खबर
काठमाडौं । बागमती प्रदेशको मुख्यमन्त्रीमा नेकपा एमालेका किरण थापा मगर नियुक्त हुनुभएको छ। प्रदेश प्रमुख दीपकप्रसाद देवकोटाले नेपालको संविधानको धारा १८६ को उपधारा २ बमोजिम थापा मगरलाई मुख्यमन्त्रीमा नियुक्त गर्नुभएको हो।
मुख्यमन्त्रीमा नियुक्त भएसँगै थापा मगरले आजै पद तथा गोपनीयताको शपथसमेत लिनुभएको छ। प्रदेश प्रमुख देवकोटाले उहाँलाई शपथ ग्रहण गराउनुभएको हो।
थापा मगरले एमाले, नेपाली कम्युनिस्ट पार्टी (नेकपा) र राष्ट्रिय प्रजातन्त्र पार्टी (राप्रपा) का प्रदेशसभा सदस्यहरूको समर्थनमा मुख्यमन्त्री पदका लागि दाबी पेश गर्नुभएको थियो। उहाँको पक्षमा ६३ जना प्रदेशसभा सदस्यको समर्थन रहेको जनाइएको छ।
बागमती प्रदेशमा राप्रपाले एमाले नेतृत्वको सरकारलाई समर्थन जनाएपछि नयाँ सरकार गठनका लागि आवश्यक बहुमत जुटेको हो। गठबन्धनको समर्थनसँगै थापा मगरलाई प्रदेशको नेतृत्व सम्हाल्ने बाटो खुलेको हो।
यसअघि नेपाली कांग्रेसका इन्द्रबहादुर बानियाँ बागमती प्रदेशको मुख्यमन्त्री हुनुहुन्थ्यो। उहाँले मुख्यमन्त्री पदबाट राजीनामा दिएपछि प्रदेशमा नयाँ सरकार गठनको प्रक्रिया अघि बढेको थियो।
बानियाँको राजीनामापछि प्रदेश प्रमुख देवकोटाले संविधानअनुसार नयाँ सरकार गठनका लागि प्रदेशसभा सदस्यहरूलाई आह्वान गर्नुभएको थियो। सोही आह्वानअनुसार थापा मगरले बहुमत प्रदेशसभा सदस्यको समर्थनसहित मुख्यमन्त्रीमा दाबी पेश गर्नुभएको थियो।
नवनियुक्त मुख्यमन्त्री थापा मगरले अब प्रदेश सरकारको नेतृत्व गर्दै सरकार सञ्चालन तथा प्रदेशका विकास निर्माणका कामलाई अघि बढाउने जिम्मेवारी सम्हाल्नुहुनेछ। नयाँ सरकारमा सहभागी हुने दल तथा मन्त्रीहरूको जिम्मेवारी र मन्त्रालय बाँडफाँटबारे थप निर्णय हुन बाँकी रहेको छ।
काठमाडौं । स्पेनले अर्जेन्टिनालाई १–० ले पराजित गर्दै सन् २०२६ को फिफा विश्वकपको उपाधि जितेपछि विश्व फुटबलमा युवा स्टार लामिन यामाल सबैभन्दा बढी चर्चामा रहे। फाइनलमा... विस्तृतमा
