राज्य ब्यवस्था सभापति हरिले ढकालले भनेः सिंहदरबारको नाम परिवर्तन गर्नुपर्छ

काठमाडौं । राष्ट्रिय स्वतन्त्र पार्टी (रास्वपा) का सांसद तथा राज्य व्यवस्था तथा सुशासन समितिका सभापति हरि ढकालले मुलुकको प्रमुख प्रशासनिक केन्द्र ‘सिंहदरबार’को नाम परिवर्तन गर्नुपर्ने बताएका छन्।

ललितपुरमा आइतबार आयोजित एक कार्यक्रममा बोल्दै सांसद ढकालले राजनीतिक परिवर्तनपछि देशका विभिन्न स्थान तथा विमानस्थलहरूको नाम परिवर्तन गरिए पनि सिंहदरबारको नाम भने यथावत् रहेको भन्दै प्रश्न उठाएका हुन्।

नेपालमा सिंह नपाइने उल्लेख गर्दै उनले ‘सिंहदरबार’ नामको सान्दर्भिकतामाथि समेत प्रश्न गरे। उनले प्रशासनिक केन्द्रको नाम परिवर्तनसँगै सिंहदरबारको कार्यशैली, व्यवहार र सोचमा समेत परिवर्तन आवश्यक रहेको बताए।

ढकालले राजनीतिक परिवर्तनपछि विभिन्न स्थानका नाम परिवर्तन गरिएको उल्लेख गर्दै सिंहदरबारलाई ‘अनामनगर दरबार’ नामकरण गर्न सकिने धारणा राखे।

उनले भने, ‘परिवर्तनपछि सबै ठाउँहरूको नाम परिवर्तन भयो, एयरपोर्टहरूका कहाँ–कहाँ नाम परिवर्तन भए। त्यो सिंहदरबार भन्ने चाहिँ, न हामीसँग सिंह छ, हैन? हामीसँग सिंह छैन। त्यो सिंहदरबार भन्ने चिजको नाम परिवर्तन भएन। त्यसलाई अनामनगर दरबार राखिदिएको भए हुन्थ्यो होला।’

सिंहदरबारको नाम मात्र नभई त्यहाँको ‘हाउभाउ, भावभङ्गी र भाषा’ समेत परम्परागत शैलीबाट प्रभावित रहेको ढकालको टिप्पणी थियो। उनले प्रशासनिक केन्द्रमा विद्यमान पुरानो सोच र कार्यशैलीलाई परिवर्तन गर्नुपर्नेमा जोड दिए।

सांसद ढकालले प्रशासनिक सुधारको सुरुवात नै सिंहदरबारबाट हुनुपर्ने धारणा राख्दै राज्य सञ्चालनको ‘मुहान’मै परिवर्तन आवश्यक रहेको बताए। उनका अनुसार राजनीतिक व्यवस्था परिवर्तन भए पनि प्रशासनिक संरचना, सोच र कार्यशैलीमा पुरानै प्रवृत्ति कायम रहे त्यसको प्रभाव नागरिकसम्म पुग्ने सेवामा समेत देखिन्छ।

उनले नाम परिवर्तनलाई मात्र परिवर्तनको आधार नमान्दै सिंहदरबारको कार्यशैली, प्रशासनिक संस्कार र पुरानो भाष्य परिवर्तन गर्नुपर्ने आवश्यकता औंल्याए। ढकालको यस्तो अभिव्यक्तिले सिंहदरबारको नाम परिवर्तनसँगै प्रशासनिक सुधारको विषयलाई समेत बहसमा ल्याएको छ।