सेतो खबर
काठमाडौं । परराष्ट्र मन्त्रालयका सहसचिव पुष्पराज भट्टराई १७ वर्षअघि भएको ट्राभल डकुमेन्ट अनियमितता प्रकरणमा पक्राउ परेका छन्। नेपाल प्रहरीको केन्द्रीय अनुसन्धान ब्यूरो (सीआईबी)ले सोमबार दिउँसो उनलाई नियन्त्रणमा लिएको हो।
यो प्रकरण २०६६ सालसँग सम्बन्धित हो। त्यसबेला पाँच जना तिब्बती शरणार्थीले परराष्ट्र मन्त्रालयबाट जारी गरिएको ट्राभल डकुमेन्टका आधारमा काठमाडौंस्थित जर्मन दूतावासमा भिसाका लागि आवेदन दिएका थिए। उनीहरूले आफूहरू हालै तिब्बतबाट नेपाल आएको र जर्मनीमा शरण पाइसकेका आफन्तसँग पुनर्मिलनका लागि जान चाहेको दाबी गरेका थिए।
तर, हालै नेपाल प्रवेश गरेको दाबी गर्ने व्यक्तिहरूले छोटो समयमै ट्राभल डकुमेन्ट प्राप्त गरेको विषयमा जर्मन दूतावासका अधिकारीहरूले शंका व्यक्त गरेपछि घटनाको अनुसन्धान अघि बढाइएको थियो।
अनुसन्धानका क्रममा ट्राभल डकुमेन्ट जारी गर्ने प्रक्रियामा अनियमितता भएको, परराष्ट्र मन्त्रालयभित्र मिलेमतो भएको आशंका, ट्राभल डकुमेन्ट हराएको तथा लामो समयदेखि टुंगोमा नपुगेको प्रकरण उजागर भएको प्रहरीको निष्कर्ष छ।
सोही प्रकरणमा सहसचिव भट्टराईविरुद्ध राहदानी ऐन, २०७६ तथा तत्कालीन राहदानी ऐन, २०२४ अनुसार कैद र जरिवानाको माग गरिएको छ। साथै, सम्भावित भ्रष्टाचारसम्बन्धी थप अनुसन्धानका लागि अख्तियार दुरुपयोग अनुसन्धान आयोगलाई समेत पत्राचार गरिएको जनाइएको छ।
सीआईबीका अनुसार भट्टराईविरुद्ध राहदानी ऐनअन्तर्गत काठमाडौं जिल्ला अदालतमा बिहीबार मुद्दा दर्ता भइसकेपछि उनलाई पक्राउ गरिएको हो।
नेपालमा रहेका शरणार्थीलाई विदेश भ्रमणका लागि ट्राभल डकुमेन्ट जारी गर्न गृह मन्त्रालयको सिफारिससहित कानुनी प्रक्रिया पूरा गर्नुपर्ने व्यवस्था छ। तर, अनुसन्धानबाट आवश्यक प्रक्रिया पूरा नगरी तथा फर्जी कागजातका आधारमा यात्रा अनुमति पत्र जारी गरिएको प्रारम्भिक आधार भेटिएपछि भट्टराईविरुद्ध कानुनी कारबाही अघि बढाइएको प्रहरीले जनाएको छ।
काठमाडौं । स्पेनले अर्जेन्टिनालाई १–० ले पराजित गर्दै सन् २०२६ को फिफा विश्वकपको उपाधि जितेपछि विश्व फुटबलमा युवा स्टार लामिन यामाल सबैभन्दा बढी चर्चामा रहे। फाइनलमा... विस्तृतमा
