विश्वकप फुटबलमा चर्चित बन्यो ‘मर्लिन’ हाँस, भिडियो भाइरल

एजेन्सी । फिफा विश्वकप २०२६ को रोमाञ्चक प्रतिस्पर्धाबीच मैदानमा खेलाडीहरू मात्र होइन, मेक्सिकोको एउटा घरपालुवा हाँस पनि विश्वभर चर्चाको विषय बनेको छ। ‘मर्लिन’ नामक दुई वर्षे हाँसले मेक्सिको राष्ट्रिय फुटबल टोलीको सानो जर्सी र मोजा लगाएर सडकमा घुमेको भिडियो सामाजिक सञ्जालमा भाइरल भएपछि ऊ अहिले विश्वकपकै चर्चित पात्रमध्ये एक बनेको छ।

मेक्सिको सिटीका सडकमा आफ्नी मालिक कार्ला गोमेज र उनका छोरा क्रिस्टियनसँग नियमित रूपमा हिँड्ने मर्लिन विश्वकप सुरु भएपछि एकाएक अन्तर्राष्ट्रिय चर्चामा आएको हो। विशेषगरी मेक्सिकोले उद्घाटन खेलमा जित निकालेपछि सडकमा भएको उत्सवका क्रममा मर्लिन टोलीको हरियो जर्सी र हाँसकै आकारअनुसार बनाइएको मोजा लगाएर प्रशंसकहरूको बीचमा देखिएको भिडियो करोडौं पटक हेरिएको छ।

मर्लिनको आत्मविश्वासपूर्ण चाल, मानिसहरूसँग सहज घुलमिल हुने बानी र मेक्सिको टोलीप्रतिको प्रतीकात्मक समर्थनले उसलाई ‘अनौपचारिक विश्वकप राजदूत’ र ‘मेक्सिकोको भाग्यमानी समर्थक’को उपनाम दिलाएको छ। सामाजिक सञ्जालमा हजारौँ प्रयोगकर्ताले मर्लिनलाई विश्वकप खेल हेर्न रंगशालामा प्रवेश दिनुपर्ने मागसमेत गरेका थिए।

मालिक कार्ला गोमेजका अनुसार मर्लिन उनीहरूको परिवारकै सदस्य हो। उनीहरूले मर्लिनलाई घरमा एक्लै छाड्न रुचाउँदैनन् र हरेक सप्ताहन्तमा आफूहरूसँगै शहरका विभिन्न स्थानमा लैजान्छन्। सडकमा पेय पदार्थ बेच्ने क्रममा पनि मर्लिन सधैं उनीहरूसँगै रहने गरेको र त्यसअघि पनि स्थानीयबासीमाझ परिचित रहेको गोमेजले बताएकी छन्।

मर्लिनको लोकप्रियता यति बढ्यो कि उसले मेक्सिकोकी राष्ट्रपतिसँग समेत भेट गर्ने अवसर पायो। राष्ट्रपति कार्यालयमा आयोजित कार्यक्रममा मर्लिनलाई विशेष अतिथिका रूपमा उपस्थित गराइएको थियो, जहाँ उसको उपस्थितिले थप चर्चा पाएको थियो।

यद्यपि, विश्वकपको खेल प्रत्यक्ष हेर्ने मर्लिनको चाहना भने पूरा हुन सकेन। फिफाले जनावरको सुरक्षा र कल्याणलाई ध्यानमा राख्दै रंगशालाभित्र जनावर लैजान नपाइने नियम लागू गरेपछि मर्लिनलाई मेक्सिकोको खेल हेर्न रंगशालाभित्र प्रवेश गर्न अनुमति दिइएन। केही समय टेलिभिजन छायांकनका लागि रंगशाला परिसरमा प्रवेश दिइए पनि खेल सुरु हुनुअघि बाहिर निकालिएको थियो।

विश्वकपमा मेक्सिकोका खेलाडीहरूले मैदानमा प्रदर्शन गरिरहेका बेला मर्लिनले भने मैदानबाहिर आफ्नै शैलीमा समर्थकहरूको मन जितिरहेको छ। फुटबलप्रेमीहरूले अहिले उसलाई प्रतियोगिताको सबैभन्दा रमाइलो र अप्रत्याशित ‘भाइरल स्टार’का रूपमा चर्चा गरिरहेका छन्।