एमालेविरुद्ध एल्गोरिदममार्फत भ्रम फैलाइयो, जनतालाई पपुलर नाराले भुलाइयो  

काठमाडौं । नेकपा (एमाले) का केन्द्रीय सचिव महेश बस्नेतले सामाजिक सञ्जालको एल्गोरिदम, विदेशी शक्तिको प्रभाव तथा राज्य संयन्त्रको दुरुपयोगमार्फत एमाले र पार्टी अध्यक्ष केपी शर्मा ओलीविरुद्ध भ्रम सिर्जना गरिएको बताएका छन् ।

शुक्रबार नेकपा (एमाले) बागमती प्रदेश संगठन कमिटीको दोस्रो बैठकलाई सम्बोधन गर्दै बस्नेतले साम्राज्यवादी शक्तिहरूको सहयोगमा युवा पुस्ता, गरिब, शोषित, सुकुम्बासी समुदाय, विदेशमा रहेका नेपाली तथा तीव्र सहरीकरण भएका क्षेत्रमा एमालेविरुद्ध व्यापक भ्रम फैलाइएको दाबी गरे ।

उनले भने, ‘एल्गोरिदमको माध्यमबाट साम्राज्यवादी शक्तिहरूको तागत र बलमा, सेना–प्रहरीलगायत राज्यका संयन्त्रहरूको दुरुपयोग गरेर कम्युनिस्ट पार्टी, नेकपा एमाले र कमरेड केपी ओलीप्रति जुनखालको भ्रम सिर्जना गरियो । त्यसले युवा पुस्ता, गरिब, शोषित, सुकुम्बासीलगायत आधारभूत वर्ग र विदेशमा रहेका युवाहरूलाई प्रभावित बनायो ।’

बस्नेतले मुलुकमाथिको आक्रमण र विनाशलाई समेत परिवर्तन र क्रान्तिका रूपमा बुझ्ने वातावरण बनाइएको आरोप लगाए ।

उनले ‘अराष्ट्रवादी तत्व’, ‘सहकारी ठगीका मुद्दा व्यहोरेका व्यक्ति’ तथा ‘अन्तर्राष्ट्रिय शक्तिका एजेण्टका रूपमा परिचालित व्यक्तिहरू’ सरकारसम्म पुगेको टिप्पणी गरे ।

‘जनताले ध्वसं र मुलुकमाथिको आक्रमणलाई क्रान्ति र परिवर्तनको रुपमा बुझ्ने परिस्थिती सिर्जना भयो । त्यसकारणले बालेज जस्तो ‘अराष्ट्रवादी तत्व’ रवि जस्तो सहकारी ठगीलगायतका दर्जनौ मुद्दा व्यहोरेको व्यक्ति र सुदन गुरुङ जस्तो टिओवी जस्ता अन्तर्राष्ट्रिय शक्तिको एजेण्टको रुपमा परिचालन शक्तिहरु आज सरकारमा पुगेका छन्,’ उनले भने ।

त्यसैगरी एमाले संसदीय दलका नेता रामबहादुर थापा बादलले वर्तमान युग समाजवादी क्रान्तिको युग भएको बताएका छन्। उनले वर्गीय दृष्टिकोणबाट हेर्दा एकातिर विश्वका वित्तीय तथा एकाधिकारी पुँजीपति वर्ग र अर्कोतिर राष्ट्रिय पुँजीपति, मजदुर तथा किसान वर्गबीच संघर्ष चलिरहेको बताए।

उनले भने, ‘आजको संघर्ष भनेको एकाधिकारी पुँजीपति र श्रमजीवी वर्गबीचको संघर्ष हो। विश्वका वित्तीय पुँजीपति तथा नेपालको सन्दर्भमा दलाल र नोकरशाह पुँजीपति एकातिर छन् भने राष्ट्रिय पुँजीपति, मजदुर र किसान अर्कोतिर छन्।’

बादलले लोकतन्त्र, राष्ट्रिय स्वाधीनता, विकास, समृद्धि र सुशासनजस्ता नारालाई एकाधिकारी पुँजीपतिहरूले जनतालाई प्रभावित पार्न प्रयोग गर्ने गरेको आरोप लगाए। उनका अनुसार यस्ता लोकप्रिय नारामार्फत जनतालाई भ्रमित गर्ने रणनीति विश्वभर अपनाइएको छ।

उनले राष्ट्रिय स्वतन्त्र पार्टीलाई ‘पपुलिज्ममा आधारित पार्टी’को संज्ञा दिँदै लोकप्रिय नाराका माध्यमबाट सामाजिक सञ्जालको एल्गोरिदम प्रयोग गरी जनतालाई भ्रमित बनाइएको दाबी गरे।

‘राष्ट्रिय स्वतन्त्र पार्टीले पनि लोकप्रिय नारा दियो। त्यही लोकप्रिय नारालाई एल्गोरिदममार्फत प्रचार गरेर जनतालाई भ्रमित बनाइयो,’ उनले भने।