सेतो खबर
काठमाडौं । नेशनल लाईफ इन्स्यारेन्स कम्पनी लि. ले आफ्नो ३९औँ वार्षिकोत्सव सप्ताहव्यापी विविध कार्यक्रमका साथ भव्य रूपमा सम्पन्न गरेको छ।
काठमाडौँस्थित होटल ह्यात सेण्ट्रिक मा आयोजित समापन समारोहमा कम्पनी अध्यक्ष श्रीमती प्रेमा राज्य लक्ष्मी सिंहले पानसमा दीप प्रज्वलन गरी कार्यक्रमको उद्घाटन गर्नुभयो। सो अवसरमा उहाँले कम्पनीलाई अग्रस्थानमा पुर्याउन महत्वपूर्ण भूमिका निर्वाह गर्ने कर्मचारी, अभिकर्ता, बीमित, शुभेच्छुक तथा सम्पूर्ण सरोकारवालाप्रति आभार व्यक्त गर्नुभयो।
अध्यक्ष सिंहले सेवाग्राहीलाई उच्चस्तरीय र सर्वसुलभ सेवा प्रदान गर्ने उद्देश्यले कर्मचारीलाई प्रविधिमैत्री बनाउने अभियानलाई तीव्रता दिइएको बताउनुभयो। कम्पनीका सम्पूर्ण प्रशासनिक कर्मचारीलाई आर्टिफिसियल इण्टेलिजेन्स (एआई) सम्बन्धी विस्तृत तालिम प्रदान गरिएको उल्लेख गर्दै यस्ता तालिमलाई आगामी दिनमा पनि निरन्तरता दिइने जानकारी दिनुभयो।
समारोहमा प्रमुख कार्यकारी अधिकृत सुरेश प्रसाद खत्रीले कर्मचारी, अभिकर्ता, बीमित तथा सरोकारवालाको प्रत्यक्ष–अप्रत्यक्ष सहयोग र सद्भावका कारण कम्पनीले बीमा क्षेत्रमा छुट्टै पहिचान बनाउन सफल भएको बताउनुभयो। उहाँले भविष्यमा पनि यही साथ र विश्वास कायम रहने अपेक्षा व्यक्त गर्दै नियामक निकाय तथा सम्बन्धित संस्थाबाट प्राप्त मार्गदर्शन र सहयोगप्रति कृतज्ञता व्यक्त गर्नुभयो।
वार्षिकोत्सवको अवसरमा कम्पनीले सामाजिक उत्तरदायित्वअन्तर्गत मातृ नेपाल बालगृह मा शैक्षिक सामग्री वितरण गर्नुका साथै त्यहाँ रहेका बालबालिकालाई भोजन गराउने कार्यक्रम सम्पन्न गरेको जनाएको छ। साथै रक्तदान कार्यक्रम समेत आयोजना गरिएको थियो। देशभर रहेका प्रदेश तथा शाखा कार्यालयहरूले पनि विभिन्न वृद्धाश्रम, बालकल्याण संस्था तथा मानव सेवा आश्रमहरूमा सामाजिक सेवा कार्यक्रम सञ्चालन गरेका थिए।
कर्मचारीको शारीरिक तथा मानसिक सुदृढीकरणका लागि अन्तर–कर्मचारी खेलकुद प्रतियोगिता आयोजना गरिएको थियो। प्रतियोगिताअन्तर्गत पुरुष तथा महिलाको क्रिकेट, फुटसल, टेबल टेनिस र बुद्धिचाल लगायतका खेल समावेश गरिएको कम्पनीले जनाएको छ।
मनोरञ्जनात्मक प्रस्तुति सहित सम्पन्न समापन समारोहमा अध्यक्ष सिंहले खेलकुद प्रतियोगिताका विजेता कर्मचारीलाई पदक तथा प्रमाणपत्र वितरण गर्नुका साथै रक्तदान गर्ने कर्मचारीलाई प्रमाणपत्र र सांस्कृतिक कार्यक्रम प्रस्तुत गर्ने कर्मचारीलाई मायाको चिनो प्रदान गर्नुभएको थियो।
काठमाडौं । स्पेनले अर्जेन्टिनालाई १–० ले पराजित गर्दै सन् २०२६ को फिफा विश्वकपको उपाधि जितेपछि विश्व फुटबलमा युवा स्टार लामिन यामाल सबैभन्दा बढी चर्चामा रहे। फाइनलमा... विस्तृतमा
