सेतो खबर
पोखरा । नेशनल लाईफ इन्स्योरेन्स कम्पनी लिमिटेडले आफ्ना कर्मचारीहरूको प्राविधिक क्षमता अभिवृद्धि तथा व्यावसायिक दक्षता विकास गर्ने उद्देश्यले “ट्रान्जिसनिङ टु द एज अफ आर्टिफिसियल इन्टेलिजेन्स” भन्ने नाराका साथ तीनदिने इम्प्लोयी स्किल इन्हान्समेन्ट प्रोग्राम पोखरास्थित होटल ग्राण्ड पोखरामा सफलतापूर्वक सम्पन्न गरेको छ ।
कार्यक्रममा कम्पनीका अध्यक्ष, प्रमुख कार्यकारी अधिकृत, व्यवस्थापन टोली तथा विभागीय प्रमुखहरू सहित देशभरका शाखा कार्यालय र केन्द्रीय कार्यालयका प्रशासनिक कर्मचारी गरी कुल २७० जना कर्मचारीको सहभागिता रहेको थियो ।
कार्यक्रमको उद्घाटन कम्पनीका अध्यक्ष श्रीमती प्रेमाराज्य लक्ष्मी सिंहले पानसमा दीप प्रज्वलन गरी गर्नुभएको थियो । उद्घाटन मन्तव्यका क्रममा उहाँले बीमा व्यवसाय प्रविधिमैत्री बन्दै गइरहेको सन्दर्भमा आर्टिफिसियल इन्टेलिजेन्ससम्बन्धी यस किसिमको विस्तृत तालिमले कम्पनीको व्यवसाय प्रवद्र्धनमा महत्वपूर्ण टेवा पुग्ने विश्वास व्यक्त गर्नुभयो ।
सो अवसरमा कार्यसम्पादन मूल्यांकनका आधारमा ‘बेस्ट इम्प्लोयी अवार्ड–२०८२’ अन्तर्गत उत्कृष्ट ठहरिएका सात जना कर्मचारी— रोहित कुमार श्रेष्ठ, जीवन बराकोटी, नेमप्रसाद थारु, बेजोन कार्की, योगेश निरौला, नविना खाती र रचना पराजुली—लाई नगद पुरस्कार तथा सम्मानपत्रसहित सम्मान गरिएको थियो ।
कम्पनीका प्रमुख कार्यकारी अधिकृत सुरेश प्रसाद खत्रीले स्वागत मन्तव्यका क्रममा दक्ष कर्मचारीबाट मात्र उत्कृष्ट परिणाम हासिल गर्न सकिने उल्लेख गर्दै डाटा विश्लेषण, ग्राहक सेवा प्रणाली लगायत प्रविधिको प्रभावकारी प्रयोगमार्फत सेवा प्रवाहलाई छिटो, सरल र गुणस्तरीय बनाउन एआई तालिमको व्यवस्था गरिएको जानकारी दिनुभयो । साथै, बीमा व्यवसायसँग प्रत्यक्ष सरोकार राख्ने सम्पत्ति शुद्धिकरण (Anti Money Laundering) सम्बन्धी तालिम पनि समावेश गरिएको उहाँले बताउनुभयो ।
कार्यक्रममा ब्रोडवे इन्फोसिसका सन्देश भट्टराईले विभिन्न उदाहरण प्रस्तुत गर्दै आर्टिफिसियल इन्टेलिजेन्ससम्बन्धी गहन प्रशिक्षण प्रदान गर्नुभएको थियो । यसैगरी, नेपाल बीमा प्राधिकरणका उपनिर्देशक पदमप्रसाद सोडारीले बीमालाई माध्यम बनाएर हुने सम्पत्ति शुद्धिकरण तथा आतंकवादी वित्तीय लगानी रोक्न सबै सचेत हुनुपर्नेमा जोड दिँदै सम्बन्धित वित्तीय गतिविधिको सूक्ष्म निगरानी आवश्यक रहेको विषयमा प्रशिक्षण दिनुभयो ।
कर्मचारीहरूको मानसिक तथा शारीरिक स्वास्थ्य अभिवृद्धि गर्ने उद्देश्यले आर्ट अफ लिभिङका डा. डोन्जन लामिछानेबाट योग प्रशिक्षण पनि प्रदान गरिएको थियो ।
कार्यक्रमअन्तर्गत सञ्चालन गरिएको पेशागत ज्ञान परीक्षणमा उत्कृष्ट नतिजा हासिल गर्दै क्रमशः प्रथम, द्वितीय र तृतीय स्थान हासिल गर्ने केन्द्रीय कार्यालयका सुरक्षा सिंह, बेजोन कार्की तथा किर्तिपुर शाखाका सिद्धार्थ महर्जनलाई नगद प्रोत्साहनसहित सम्मान गरिएको थियो । साथै, प्रदेशस्तरीय फुटसल प्रतियोगितामा क्रमशः लुम्बिनी प्रदेश, गण्डकी प्रदेश र केन्द्रीय कार्यालय विजेता बनेका खेलाडीहरूलाई पनि पुरस्कृत गरिएको थियो ।
कार्यक्रमको समापन गर्दै कम्पनीका उप–कार्यकारी प्रमुख स्मृति राज कँडेलले धन्यवाद ज्ञापन गर्दै आगामी दिनमा पनि यस्ता सीपमूलक तथा प्रेरणादायी कार्यक्रमहरू निरन्तर सञ्चालन गरिने बताउनुभयो ।
काठमाडौं । स्पेनले अर्जेन्टिनालाई १–० ले पराजित गर्दै सन् २०२६ को फिफा विश्वकपको उपाधि जितेपछि विश्व फुटबलमा युवा स्टार लामिन यामाल सबैभन्दा बढी चर्चामा रहे। फाइनलमा... विस्तृतमा
