कोरोना : कटेजमा ताल्चा, बैंकमा ऋण, तनावमा पर्यटन व्यवसायी

झापा । कन्काई नगरपालिकाका डिपी आचार्य अहिले तनावमा छन् । इलामको सूर्योदय नगरपालिकास्थित अन्तुमा सञ्चालित कटेज बन्द गर्नु परेपछि उनको तनावको पारो उक्लिएको हो ।

दुई वर्षअघि आचार्यले साहु र बैंकबाट ऋण लिएर जग्गा भाडामा लिई अन्तुमा कटेज खोले । लकडाउन सुरु भएपछि कटेज बन्द छ । कारोबार गर्न नपाए पनि कटेजको लिज भाडा, बैंकको ऋण र साहुको पुरानो रकमले आचार्यको मन पोल्छ ।

‘दुई वर्षअघि मात्र लिजमा लिएको, कमाइ पनि राम्रै थियो,’ आचार्य भन्छन्, ‘अहिले त के गर्ने, कसो गर्ने भइयो । लकडाउनको समयमा पनि भाडा त लागेको छ । कसरी तिर्ने ?’ १५ लाख लगानी गरेर आचार्यसहित दुईजनाले कटेल सञ्चालन गरेका थिए । ‘लकडाउनले गर्दा कटेज त खोल्नै पाएको छैन । साहुले केही महिनाको भाडा छुट दिए भनेचाहिँ चलाउन सकिन्छ,’ आचार्यले भने ।

२० जना क्षमताको कटेज चलाएका आचार्यले यो सिजनमा विगतका वर्षमा मासिक खर्च कटाएर ९० हजारसम्म बचाउँथे । अहिले कटेज नै बन्द भएपछि दैनिकी चलाउनसमेत सकस परेको उनले सुनाए । भ्रमण वर्षको समयमा उल्लेख्य फाइदा लिने सोच बनाउँदै गर्दा कोरोनाको समस्याले आजित बनाएको आचार्यको भनाइ छ ।

दैनिक ४०० हाराहारीमा पर्यटक भित्रिने अन्तुमा पर्यटन व्यवसाय नै ठप्प हुँदा नसोचेको घाटा व्यहोर्नुपरेको घरवास (होमस्टे) सञ्चालक धनबहादुर आले बताउँछन् । आलेका अनुसार सिजनमै बन्द गर्नुपर्दा व्यवसायीले ऋणको चर्को ब्याजदर सामना गर्नुपर्दैछ भने पर्यटकीय क्षेत्र पहिलेकै स्तरमा पुर्याउनसमेत समस्या पर्ने भएको छ । मुलुककै प्रमुख पर्यटकीय क्षेत्र श्रीअन्तु सुनसान बनेपछि व्यवसायीले खुलाउन पहल गर्दै आएका छन् । महामारीमा होमस्टे र कटेज खोल्दा पर्यटक आए पनि जोखिम बढाउने भएकाले व्यवसायी अन्योलमा परेका हुन् । कटेज खोल्दा महामारी फैलिएमा आफैंले जिम्मा लिनुपर्ने भएकाले पनि खोल्न नसकिएको अन्तु पर्यटन व्यवसायी संघका सचिव रुद्र घिमिरे बताउँछन् ।

रुँगालोका भरमा घरवास
घरवासमा चहलपहल शून्य भएपछि यतिबेला अन्तुका घरवासमा रुँगालो मात्र राख्न थालिएको छ । होटलका कर्मचारीसमेत घर पठाएपछि घरवास सुनसान हुने गरेको सचिव घिमिरे बताउँछन् । ‘कोही इलामका त कोही भारतकै पनि कर्मचारी राखिएको थियो तर अहिले सबै घर गइसके,’ घिमिरेले भने, ‘सधैं बाक्लो चहलपहल भइरहने यो क्षेत्रमा अहिले सुनसान छ ।’

उनले घरवास सञ्चालन गर्न पहल भए पनि महामारी फैलिएमा अझै समस्या आउने भएकाले खोल्न नसकिएको बताए । धेरैजसो पर्यटक गर्मी छल्नका लागि अन्तु आउने गर्थे तर गर्मीकै सिजनमा बन्द भइदिँदा व्यवसायीलाई धेरै नोक्सान भएको घिमिरेको भनाइ छ ।