पर्यटकको पर्खाइमा लोदेनको छोनासिङ पोखरी

ताप्लेजुङ । ताप्लेजुङको मिक्वाखोला गाउँपालिका–५ लोदेन क्षेत्रमा रहेको आकर्षक छोनासिङ पोखरी पर्यटकको पर्खाइमा छ । लोदेन फाँटको हरियालीबिच अवस्थित अण्डाकार आकृतिको यो पोखरी यस क्षेत्रको प्रमुख पर्यटकीय सम्पदामध्ये एक हो ।

ताप्लेजुङ हिमाल, पहाड, धार्मिक र साहसिक गन्तव्यका लागि चिनिएको जिल्ला हो । विश्वको तेस्रो अग्लो कञ्चनजङ्घा हिमाल, धार्मिक आस्थाको प्रतीक पाथीभरा, बुकी फुलले भरिएका फाँट र प्राकृतिक पोखरीहरूले पर्यटकलाई लोभ्याउने गर्छन् । यिनै गन्तव्यहरूमध्ये लोदेन क्षेत्र पनि प्राकृतिक सौन्दर्यले भरिपूर्ण एक सम्भावनायुक्त स्थल हो ।

हरेक वर्ष जडीबुटी सङ्कलन गर्दै आएका मिलन लिम्बूका अनुसार, हरियाली घाँसे मैदानमा अवस्थित लाम पोखरी यस क्षेत्रकै ठुलो पोखरी हो । यद्यपि अहिलेसम्म कुनै पनि निकायले यसको वैज्ञानिक अध्ययन वा मापन गरेको छैन ।

छोनासिङ पोखरी (लाम पोखरी) समेत भनेर चिनाउने गरेका छन् । मिक्वाखोला–५ का वडा सदस्य तोप्ला शेर्पाका अनुसार, यस पोखरीसँग अनेकौँ किंवदन्ती कथाहरू जोडिएका छन् । उनले भने, ‘यहाँ आउने जो कोही पोखरीको सौन्दर्यले मन्त्रमुग्ध हुन्छन् । पोखरीको नजिक पुगेर फोटो वा भिडियो खिचेपछि मात्रै फर्कन्छन् ।’

पोखरीको चारैतिर फैलिएको हरियाली, टाढासम्म देखिने हिमाली भू–दृश्य र आकाशमा तैरिने हिउँजस्ता बादलहरूले यो क्षेत्रलाई अपूर्व बनाउँछन् । यस पोखरीलाई नीलो शान्त पानी र चुपचाप बसिरहेको स्वरूपले प्रकृतिको कविता जस्तै बनाएको छ ।

शेर्पा समुदायका अनुसार पोखरी प्राकृतिक सम्पदा मात्र होइन, धार्मिक र सांस्कृतिक दृष्टिले पनि अत्यन्तै महत्त्वपूर्ण स्थल हो । यहाँ आउने पर्यटकहरू पोखरीको छेउमै बसेर शान्तिको अनुभूति गर्छन् र त्यो क्षणलाई तस्बिर र भिडियोमा कैद गरेर फर्कन्छन् ।

मिक्वाखोला–५ सिम्बुकका स्थानीय पान्दे शेर्पाका अनुसार, ‘पोखरी नजिक पुगेर हेर्दा आत्मा नै भावुक हुन्छ । त्यहाँको सौन्दर्यले मनको गहिराई सम्म छुन्छ ।’ उच्च हिमाली भूभागमा पर्ने यो क्षेत्रमा अहिले पनि न त मानव बस्ती छ, न होटेल वा होमस्टे । बसोबासका लागि याक गोठ र भेडी गोठमा निर्भर रहनुपर्छ । केही स्थानमा समुदायले आफन्तको सम्झनामा बनाएका पाटी तथा धर्मशालाहरूमा रात बिताउन सकिन्छ । खाद्य सामग्री समेत पर्यटकले आफै जोहो गरेर लैजानुपर्ने हुन्छ ।

स्थानीय गाइड पान्दे शेर्पाका अनुसार, पर्यटकलाई यहाँ एक सातासम्म घुम्न समय लाग्छ । गाउँपालिकाले पछिल्लो समय लाम पोखरी क्षेत्रको प्रवद्र्धनमा चासो देखाउन थालेको छ ।