विवाद र आलाेचनापछि ‘ग्रिन आर्मी’को दर्ता खारेज

काठमाडौं ।  नेपाली सेनासँग मिल्दोजुल्दो पोशाक तथा संरचना प्रयोग गरेको भन्दै विवादमा आएको ‘ग्रिन आर्मी’ नामक संस्थाको दर्ता खारेज गरिएको छ।

भोटेकोशी–त्रिशूली क्षेत्रमा आएको बाढीपछि उद्धार तथा राहतका क्रममा संस्थाका सदस्यहरू सैनिकजस्तो पोशाकमा फिल्डमा देखिएपछि ‘ग्रिन आर्मी’ विवादमा तानिएको थियो। बाढी प्रभावित क्षेत्रमा नेपाली सेनाको जस्तै देखिने पोशाकमा खटिएका व्यक्तिहरू देखिएपछि संस्थाको प्रकृति र गतिविधिबारे प्रश्न उठेको थियो।

कम्पनी रजिष्ट्रारको कार्यालयमा गैरनाफामूलक कम्पनीका रूपमा २०७७ साउनमा दर्ता भएको उक्त संस्थाले सामाजिक सेवा तथा विपद् व्यवस्थापनका क्षेत्रमा काम गर्दै आएको थियो। संस्थाले विभिन्न विपद्का घटनामा उद्धार, राहत तथा स्वयंसेवी गतिविधि सञ्चालन गर्दै आएको बताइएको छ।

तर पछिल्लो समय संस्थाले प्रयोग गर्दै आएको हरियो प्यारामिलिटरी शैलीको पोशाक, सैनिक शैलीका दर्ज्यानी चिह्न तथा संगठनात्मक संरचनालाई लिएर विवाद उत्पन्न भएको हो। गैरसैनिक संस्थाले नेपाली सेनासँग मिल्दोजुल्दो पोशाक र संरचना प्रयोग गर्दा सर्वसाधारणमा भ्रम सिर्जना हुन सक्ने भन्दै प्रश्न उठाइएको थियो।

सैनिक स्रोतका अनुसार संस्थाको दर्ता खारेज भएसँगै ‘ग्रिन आर्मी’का नाममा सञ्चालन हुँदै आएका गतिविधिमा समेत प्रतिबन्ध लागेको छ।

यसअघि संस्थालाई हरियो प्यारामिलिटरी पोशाक तथा सैनिक शैलीका दर्ज्यानी चिह्न प्रयोग गर्न अनुमति दिइएको विषय पनि विवादमा आएको थियो। उक्त अनुमति कसरी र कुन आधारमा दिइयो भन्ने विषयमा समेत चासो व्यक्त गरिएको थियो।

सामाजिक तथा विपद् व्यवस्थापनको क्षेत्रमा स्वयंसेवी संस्थाको भूमिका महत्वपूर्ण भए पनि सुरक्षा निकायसँग मिल्दोजुल्दो पहिचान र संरचना प्रयोग गर्ने विषय संवेदनशील मानिन्छ। यही विषयलाई लिएर ‘ग्रिन आर्मी’को गतिविधिमाथि प्रश्न उठ्दै आएको थियो।

‘ग्रिन आर्मी’का प्रमुख सल्लाहकारमा नेपाल प्रहरीका पूर्वमहानिरीक्षक सर्वेन्द्र खनाल रहेको बताइएको छ।

संस्थाको दर्ता खारेजीसँगै गैरनाफामूलक संस्थाले सैन्य वा अर्धसैनिक शैलीका पोशाक, दर्ज्यानी चिह्न तथा संरचना प्रयोग गर्न पाउने–नपाउने विषयमा समेत बहस सुरु भएको छ।