सेतो खबर
काठमाडौं । ब्राजिलका महान् फुटबलर रोनाल्डिन्हो ४६ वर्षको उमेरमा पुनः फुटबल मैदानमा फर्किने भएका छन्। सन् २००२ को फिफा विश्वकप, २००५ को बालोन डी’ओर तथा २००६ को यूईएफए च्याम्पियन्स लिग जितिसकेका रोनाल्डिन्होले इटालीको सिरी सी क्लब राभेन्ना एफसीसँग आबद्ध हुँदै पुनरागमनको घोषणा गरेका हुन्।
रोनाल्डिन्होको पुनरागमनलाई क्लबले बिहीबार आयोजित विशेष ‘रोनाल्डिन्हो डे’ कार्यक्रममार्फत औपचारिक रूपमा सार्वजनिक गरेको हो। इटालीको पूर्वी तटीय क्षेत्रमा रहेको राभेन्ना ११३ वर्ष पुरानो क्लब हो। रोनाल्डिन्हो क्लबको शेयरधनीसमेत रहेका छन्।
विश्व फुटबलमा आफ्नो अद्वितीय ड्रिब्लिङ, पास, फ्रिकिक र आकर्षक खेलशैलीका कारण छुट्टै पहिचान बनाएका रोनाल्डिन्हो लामो समयदेखि सक्रिय व्यावसायिक फुटबलबाट बाहिर थिए। उनले सन् २०१८ मा खेलाडी जीवनबाट सन्यास घोषणा गरेका थिए। त्यसपछि उनी विभिन्न फुटबलसम्बन्धी कार्यक्रम, प्रदर्शनी खेल र व्यावसायिक गतिविधिमा सक्रिय रहँदै आएका छन्।
राभेन्नासँगको आबद्धताले भने उनलाई पुनः प्रतिस्पर्धात्मक फुटबलमा फर्काउने सम्भावना बढाएको छ। क्लबको कार्यक्रमका क्रममा रोनाल्डिन्होलाई मैदानमा कहिले उत्रने भन्ने प्रश्नसमेत गरिएको थियो। त्यसको जवाफमा उनले आफू राभेन्नासँग जोडिन पाउँदा खुसी रहेको तर मैदानमा फर्कने विषयमा केही समय पर्खनुपर्ने संकेत गरे।
“म यहाँ आफ्ना साथीहरूसँग हुन पाउँदा निकै खुसी छु, तर टोलीसँग सबै कुरा राम्रो हुँदै जान्छ कि जाँदैन, त्यसका लागि केही समय पर्खौं,” रोनाल्डिन्होले भने।
रोनाल्डिन्होले ब्राजिलको राष्ट्रिय टोलीबाट ९७ खेल खेल्दै ३३ गोल गरेका छन्। उनले ब्राजिललाई सन् २००२ को विश्वकप जिताउन महत्वपूर्ण भूमिका खेलेका थिए। उक्त टोलीमा रोनाल्डो र रिभाल्डोसँगै रोनाल्डिन्हो ब्राजिलको आक्रमणको प्रमुख हिस्सा थिए।
क्लब फुटबलमा भने उनको सबैभन्दा चर्चित समय स्पेनिस क्लब बार्सिलोनामा बितेको थियो। सन् २००३ देखि २००८ सम्म बार्सिलोनामा रहँदा उनले क्लबलाई ला लिगा र च्याम्पियन्स लिगसहित विभिन्न उपाधि जिताउन महत्वपूर्ण योगदान दिएका थिए। सन् २००५ मा उनले विश्वकै प्रतिष्ठित व्यक्तिगत फुटबल अवार्ड बालोन डी’ओर जितेका थिए।
बार्सिलोनापछि उनले एसी मिलानबाट पनि खेले। त्यसअघि पेरिस सेन्ट जर्मेन र फ्रान्सेली फुटबल क्लबबाट आफ्नो युरोपेली करियर स्थापित गरेका थिए। ब्राजिल फर्किएपछि फ्लुमिनेन्सेलगायत क्लबबाट समेत उनले खेले।
रोनाल्डिन्होको पुनरागमनले राभेन्ना एफसीप्रति विश्व फुटबलको ध्यान तानिएको छ। ४६ वर्षको उमेरमा उनी वास्तविक प्रतिस्पर्धात्मक खेलमा कति समय मैदानमा रहन्छन् र कस्तो प्रदर्शन गर्छन् भन्ने विषय अहिले समर्थकका लागि चासोको विषय बनेको छ।
उनको पुनरागमन केवल खेलाडीका रूपमा मात्र नभई क्लबको व्यावसायिक तथा प्रचारात्मक पक्षमा समेत महत्वपूर्ण हुने अपेक्षा गरिएको छ। विश्वभर ठूलो समर्थक आधार भएका रोनाल्डिन्होको उपस्थितिले राभेन्नाको अन्तर्राष्ट्रिय पहिचान बढाउन सहयोग पुग्ने अनुमान गरिएको छ।
यद्यपि, रोनाल्डिन्होले राभेन्नाबाट आधिकारिक प्रतिस्पर्धात्मक खेलमा कहिले डेब्यु गर्ने भन्ने कुरा भने अझै स्पष्ट भएको छैन। क्लब र रोनाल्डिन्होबीचको सहकार्यले उनको लामो समयपछिको फुटबल पुनरागमनलाई कस्तो रूप दिन्छ भन्ने विषय आगामी दिनमा स्पष्ट हुनेछ।
काठमाडौं । स्पेनले अर्जेन्टिनालाई १–० ले पराजित गर्दै सन् २०२६ को फिफा विश्वकपको उपाधि जितेपछि विश्व फुटबलमा युवा स्टार लामिन यामाल सबैभन्दा बढी चर्चामा रहे। फाइनलमा... विस्तृतमा
