सेतो खबर
काठमाडौं ।सरकारले आयुर्वेद चिकित्सा परिषद्, नेपाल स्वास्थ्य व्यवसायी परिषद्, नेपाल मेडिकल काउन्सिल र नेपाल स्वास्थ्य अनुसन्धान परिषद्मा नयाँ पदाधिकारी नियुक्त गरेको छ।
सरकारले आयुर्वेद चिकित्सा परिषद्को रजिस्ट्रारमा डा. हरि शरण अर्याल, नेपाल स्वास्थ्य व्यवसायी परिषद्को रजिस्ट्रारमा रमेश श्रेष्ठ, नेपाल मेडिकल काउन्सिलको रजिस्ट्रारमा डा. सुप्रभात श्रेष्ठ र नेपाल स्वास्थ्य अनुसन्धान परिषद्को सदस्यसचिवमा डा. प्रमोद जोशीलाई नियुक्त गरेको हो।
नवनियुक्त पदाधिकारीहरूले शुक्रबार स्वास्थ्य तथा खाद्य स्वच्छता मन्त्री निशा मेहतासमक्ष पद तथा गोपनीयताको शपथ ग्रहण गरेका छन्।
डा. अर्याल आयुर्वेद परिषद्को रजिस्ट्रार
आयुर्वेद चिकित्सा परिषद्को रजिस्ट्रारमा नियुक्त डा. हरि शरण अर्यालले त्रिभुवन विश्वविद्यालयअन्तर्गत आयुर्वेद क्याम्पसबाट बीएएमएस तथा कायचिकित्सामा एमडी गरेका छन्।
उनी सन् २००९ देखि नेशनल नेचर केयर हस्पिटलमा मेडिकल डाइरेक्टरका रूपमा कार्यरत छन्। यसअघि उनले नरदेवीस्थित आयुर्वेद अस्पतालमा कन्सल्टेन्ट कायचिकित्सकका रूपमा समेत काम गरेका थिए।
रमेश श्रेष्ठ स्वास्थ्य व्यवसायी परिषद्को रजिस्ट्रार
नेपाल स्वास्थ्य व्यवसायी परिषद्को रजिस्ट्रारमा नियुक्त रमेश श्रेष्ठले भारतबाट मेडिकल रेडियोग्राफीमा स्नातक तथा रेडिएसन एन्ड इमेजिङ टेक्नोलोजीमा स्नातकोत्तर गरेका छन्।
उनी हाल पाटन स्वास्थ्य विज्ञान प्रतिष्ठानमा वरिष्ठ रेडियो टेक्नोलोजिस्टका रूपमा कार्यरत छन्। स्वास्थ्य व्यवसायीको नियमन तथा व्यावसायिक मापदण्ड कायम गर्ने परिषद्को प्रशासनिक नेतृत्वमा उनको नियुक्ति भएको हो।
डा. सुप्रभात श्रेष्ठ मेडिकल काउन्सिलको रजिस्ट्रार
नेपाल मेडिकल काउन्सिलको रजिस्ट्रारमा नियुक्त डा. सुप्रभात श्रेष्ठ दन्त चिकित्सक तथा अर्थोडोन्टिक्स विशेषज्ञ हुन्। उनले बीडीएस तथा स्टोमाटोलोजीमा विद्यावारिधि गरेका छन्।
डा. श्रेष्ठ यसअघि नेपाल मेडिकल काउन्सिलका सदस्यसमेत रहिसकेका छन्। काउन्सिलमा रहँदा उनले शिक्षा, परीक्षा तथा आचारसंहितासम्बन्धी समितिमा जिम्मेवारी सम्हालेका थिए।
डा. जोशी स्वास्थ्य अनुसन्धान परिषद्को सदस्यसचिव
नेपाल स्वास्थ्य अनुसन्धान परिषद्को सदस्यसचिवमा नियुक्त डा. प्रमोद जोशीले एमबीबीएस तथा अर्थोपेडिक्स एन्ड ट्रमा विषयमा एमएस गरेका छन्।
उनले यसअघि नेपाल स्वास्थ्य अनुसन्धान परिषद्को कार्यकारी सदस्यसचिव, राष्ट्रिय ट्रमा सेन्टरका मेडिकल सुपरिटेन्डेन्ट, गेटा अस्पतालका संस्थापक निर्देशक तथा सेती प्रादेशिक अस्पतालका वरिष्ठ अर्थोपेडिक सर्जनका रूपमा जिम्मेवारी सम्हालिसकेका छन्।
चारै जनाको नियुक्तिसँगै सम्बन्धित स्वास्थ्य निकायको प्रशासनिक तथा प्राविधिक नेतृत्व थप प्रभावकारी हुने अपेक्षा गरिएको छ। नयाँ पदाधिकारीले आ–आफ्नो क्षेत्रको नियमन, सेवा व्यवस्थापन, स्वास्थ्य अनुसन्धान तथा व्यावसायिक मापदण्ड कार्यान्वयनमा भूमिका खेल्नेछन्।
काठमाडौं । स्पेनले अर्जेन्टिनालाई १–० ले पराजित गर्दै सन् २०२६ को फिफा विश्वकपको उपाधि जितेपछि विश्व फुटबलमा युवा स्टार लामिन यामाल सबैभन्दा बढी चर्चामा रहे। फाइनलमा... विस्तृतमा
