सेतो खबर
हेटौँडा । मकवानपुरमा दैनिकजसो सवारी दुर्घटनाका घटना भइरहेका बेला सडक सुरक्षालाई मध्यनजर गर्दै जिल्ला ट्राफिक प्रहरी कार्यालय मकवानपुरले ट्राफिक नियम उल्लङ्घन गर्ने सवारी साधनमाथि नियमित रूपमा कडाइ थालेको छ ।
दुर्घटना न्यूनीकरण, सडक अनुशासन कायम गर्ने तथा चालकलाई ट्राफिक नियमप्रति जिम्मेवार बनाउन दैनिकजसो विभिन्न स्थानमा सवारी जाँच अभियान सञ्चालन भइरहेको प्रहरीले जनाएको छ।
जिल्ला ट्राफिक प्रहरी कार्यालय मकवानपुरका प्रहरी निरीक्षक रमेश बिष्टका अनुसार पछिल्लो समय ओभरलोड सवारी सञ्चालन, आवश्यक स्टिकरबिनै अटो सञ्चालन, सवारी चलाउने क्रममा धूम्रपान गर्ने, ट्राफिक नियमको बेवास्ता गर्ने लगायतका गतिविधिबारे सर्वसाधारणबाट निरन्तर गुनासा आएपछि विशेष चेकिङ अभियान सञ्चालन गरिएको हो।
सोही अभियानअन्तर्गत गरिएको चेकजाँचका क्रममा ट्राफिक नियम उल्लङ्घन गर्ने ५० वटा सवारी साधनलाई कारबाही गरिएको प्रहरीले जनाएको छ। आवश्यक कागजात नबोक्ने, तोकिएको मापदण्ड विपरीत सवारी सञ्चालन गर्ने, ओभरलोड गरेर सवारी चलाउने तथा अन्य ट्राफिक नियम उल्लङ्घन गर्ने चालकहरूलाई प्रचलित कानुनअनुसार कारबाही गरिएको प्रहरी निरीक्षक बिष्टले जानकारी दिए।
प्रहरीका अनुसार मकवानपुरमा बढ्दो सवारी चापसँगै दुर्घटनाको जोखिम पनि बढ्दै गएको छ। त्यसैले दुर्घटना न्यूनीकरण गर्न, सडकलाई सुरक्षित र व्यवस्थित बनाउन तथा चालक र यात्रु दुवैमा ट्राफिक सचेतना अभिवृद्धि गर्ने उद्देश्यले नियमित रूपमा ट्राफिक जाँचलाई निरन्तरता दिइएको हो।
जिल्ला ट्राफिक प्रहरी कार्यालय मकवानपुरले सबै सवारी चालकलाई ट्राफिक नियमको पूर्ण पालना गर्न, सवारीका आवश्यक कागजात साथमा राख्न, तोकिएको क्षमताभन्दा बढी यात्रु वा सामान नबोक्न तथा जिम्मेवारीपूर्वक सवारी सञ्चालन गर्न आग्रह गरेको छ।
आगामी दिनमा पनि नियम उल्लङ्घन गर्ने सवारी साधनमाथि कडाइका साथ निगरानी र कारबाही जारी रहने प्रहरीले जनाएको छ।
काठमाडौं । स्पेनले अर्जेन्टिनालाई १–० ले पराजित गर्दै सन् २०२६ को फिफा विश्वकपको उपाधि जितेपछि विश्व फुटबलमा युवा स्टार लामिन यामाल सबैभन्दा बढी चर्चामा रहे। फाइनलमा... विस्तृतमा
