राष्ट्र बैंक नियमन नियन्त्रणका लागि मात्र होइन, उत्पादनमा सक्रिय हुनुपर्छ : अर्थमन्त्री वाग्ले

राष्ट्र बैंकलाई अर्थमन्त्रीको निर्देशन : नियामक मात्र होइन, आर्थिक रूपान्तरणको सहयात्री बन्नुपर्छ

अर्थमन्त्री डा. स्वर्णिम वाग्लेले नेपाल राष्ट्र बैंकलाई केवल नियामक संस्थाको भूमिकामा सीमित नरही देशको आर्थिक रूपान्तरणको सहयात्रीका रूपमा सक्रिय भूमिका निर्वाह गर्न आग्रह गरेका छन्।

नेपाल राष्ट्र बैंकका कार्यकारी निर्देशकहरूसँग आयोजित समन्वय बैठकलाई सम्बोधन गर्दै उनले नियमनको उद्देश्य नियन्त्रण गर्नु मात्र नभई उत्पादनशील आर्थिक गतिविधिलाई प्रोत्साहन गर्ने वातावरण सिर्जना गर्नु रहेको बताए।

“अहिलेको मुख्य आवश्यकता नीतिगत आत्मविश्वास हो,” मन्त्री वाग्लेले भने, “हामीले ‘यो सम्भव छैन’ भन्ने सोचबाट बाहिर निस्किएर ‘यसलाई सम्भव बनाउन के गर्नुपर्छ?’ भन्ने दृष्टिकोणका साथ अघि बढ्नुपर्छ।”

उनले पछिल्लो समय उद्योगी–व्यवसायी तथा बैंकका प्रमुख कार्यकारी अधिकृत (सीईओ) हरूसँग भएका छलफलको अनुभव सुनाउँदै निजी क्षेत्रले सहुलियतभन्दा बढी स्पष्ट नीति, स्थिर नियम र छिटो निर्णय प्रक्रिया अपेक्षा गरेको बताए। बैंकिङ प्रणालीमा रहेको अधिक तरलतालाई उद्योग, उत्पादन र रोजगारी सिर्जनामा कसरी रूपान्तरण गर्ने भन्ने विषयमा राष्ट्र बैंकले विशेष ध्यान दिनुपर्ने उनको भनाइ थियो।

“विगतमा नीतिगत रूपमा सही निर्णयहरू भए पनि कार्यान्वयनको चरणमा अपेक्षित परिणाम किन आएन? बैंकमा पर्याप्त तरलता हुँदा पनि उत्पादनमूलक क्षेत्रमा कर्जा किन पुग्न सकेन?” भन्दै उनले मौद्रिक र वित्तीय नीतिबीचको समन्वयलाई अझ प्रभावकारी बनाउनुपर्नेमा जोड दिए।

बैठकमा उठेका सुझाव र विषयलाई केवल औपचारिक टिप्पणीमै सीमित नराखी आवश्यक परे संयुक्त कार्यदल गठन गरेर कार्ययोजनाका रूपमा अघि बढाइने प्रतिबद्धता पनि उनले जनाए।

अर्थमन्त्री वाग्लेले आर्थिक सुधार, डिजिटल वित्त, फिनटेक तथा स्टार्टअप वित्तपोषणलाई सहज बनाउन नेपाल राष्ट्र बैंकले नीतिगत स्पष्टता, समन्वय र तत्परताका साथ काम गर्नुपर्ने निर्देशन दिएका छन्।