सेतो खबर
काठमाडौं । त्रिभुवन विश्वविद्यालय (त्रिवि) को व्यवस्थापन संकायअन्तर्गत मास्टर्स अफ बिजनेस स्टडिज (एमबीएस) प्रथम सत्रको प्रश्नपत्र सामाजिक सञ्जालमार्फत सार्वजनिक गरेको आरोपमा प्रहरीले दुई जनालाई नियन्त्रणमा लिएको छ। घटनाको अनुसन्धान नेपाल प्रहरीको केन्द्रीय अनुसन्धान ब्युरो (सीआईबी) ले अघि बढाइरहेको छ।
शिक्षा तथा खेलकुद मन्त्रालयका अनुसार प्रश्नपत्र बाहिरिएको सूचना प्राप्त हुनासाथ शिक्षामन्त्री **सस्मित पोखरेल** ले शनिबार राति नै प्रहरी महानिरीक्षक (आईजीपी) दानबहादुर कार्कीसँग छलफल गरी दोषीलाई तत्काल पक्राउ गर्न निर्देशन दिएका थिए। त्यसलगत्तै प्रहरीले आइतबार बिहान प्रश्नपत्र सार्वजनिक गरेको आरोप लागेका व्यक्तिलाई नियन्त्रणमा लिएको हो।
सीआईबीले पक्राउ परेकाहरूको नाम औपचारिक रूपमा सार्वजनिक नगरे पनि अनुसन्धानका क्रममा रहेको जनाएको छ। प्रहरी स्रोतका अनुसार ‘सुलभ सर’ भनेर चिनिने व्यक्तिसहित दुई जना पक्राउ परेका छन्।
प्रारम्भिक अनुसन्धानमा पक्राउ परेका व्यक्तिले ‘MBS First Sem Section C’ नामक ह्वाट्सएप समूहमार्फत परीक्षा सुरु भएको करिब पाँच मिनेटमै ‘अर्गनाइजेसनल बिहेबियर’ विषयको प्रश्नपत्र सार्वजनिक गरेको खुलेको प्रहरीले जनाएको छ।
साउन ८ गते परीक्षा सुरु भएको केही मिनेटमै प्रश्नपत्र सामाजिक सञ्जालमा भाइरल भएपछि फेसबुक पेज ‘TU Students’ ले ह्वाट्सएप ग्रुपका स्क्रिनसट सार्वजनिक गर्दै त्रिभुवन विश्वविद्यालयको ध्यानाकर्षण गराएको थियो। त्यसपछि व्यवस्थापन संकायको डिन कार्यालयले साइबर ब्युरोलाई आवश्यक अनुसन्धानका लागि पत्राचार गरेको थियो।
घटनालाई गम्भीर रूपमा लिँदै शिक्षामन्त्री पोखरेलले मन्त्रालय, प्रहरी र त्रिविका पदाधिकारीसँग रातभर छलफल गरेका थिए। साथै, त्रिभुवन विश्वविद्यालयको परीक्षा नियन्त्रण महाशाखाले पनि घटनाको सत्यतथ्य छानबिन गर्न तीन सदस्यीय समिति गठन गरेको छ।
प्रा. डा. अच्युत ज्ञवालीको संयोजकत्वमा गठित समितिमा सहप्राध्यापक डा. पुष्कर रैखला र सहप्राध्यापक डा. महेशराज ओझा सदस्य रहेका छन्। समितिलाई घटनाको विस्तृत छानबिन गरी सात कार्यदिनभित्र प्रतिवेदन बुझाउने कार्यादेश दिइएको छ।
प्रश्नपत्र लिक भएको घटनाले त्रिभुवन विश्वविद्यालयको परीक्षा प्रणालीमाथि गम्भीर प्रश्न उठाएको छ। यस घटनामा संलग्न अन्य व्यक्तिको खोजी गर्दै प्रहरीले अनुसन्धानलाई थप तीव्र बनाएको जनाएको छ।
काठमाडौं । भावी प्रधानन्यायाधीश नियुक्तिका लागि सिफारिस गर्ने उद्देश्यले आज संवैधानिक परिषद्को बैठक बस्दैछ। परिषद्का अध्यक्ष तथा प्रधानमन्त्री बालेन्द्र शाह... विस्तृतमा
