मानवीय समस्या समाधानमा सरकार गम्भीर बनोस्, कांग्रेस साथ दिन तयार छ : विश्वप्रकाश शर्मा

काठमाडौं । नेपाली कांग्रेसका उपसभापति विश्वप्रकाश शर्मा ले सरकारले मुलुकमा देखिएका मानवीय समस्या र नागरिकका पीडाप्रति गम्भीर भएर तत्काल प्रभावकारी कदम चाल्नुपर्ने बताएका छन्। सरकार समस्या समाधानमा अग्रसर भए नेपाली कांग्रेसले पूर्ण सहयोग गर्ने उनले स्पष्ट पारेका छन्।

सोमबार बिहान फेसबुकमार्फत भिडियो सन्देश जारी गर्दै शर्माले पछिल्ला दिनमा देशमा देखिएका घटनाले सरकार, राजनीतिक दल र समग्र नेतृत्वलाई गम्भीर बन्न बाध्य बनाएको बताए। उनले मानवीय संकटलाई राजनीतिक मुद्दाका रूपमा नभई नागरिकको जीवन र राज्यप्रतिको विश्वाससँग जोडिएको विषयका रूपमा हेर्नुपर्ने धारणा राखे।

सरकारले पीडित नागरिकको समस्या समाधानलाई प्राथमिकतामा राख्नुपर्ने उल्लेख गर्दै उनले भने, “हामी सरकारको साथमा उभिन चाहन्छौँ। सरकार अघि बढोस्, समस्याको गम्भीरता बुझोस् र पीडितको दुःख सम्बोधन गरोस्। त्यसो भए देश र हामी सबै सरकारको साथमा हुनेछौँ। यो पक्ष–विपक्षको होइन, समाजमा आशा जगाउने विषय हो।”

शर्माले कीर्तिपुरस्थित होल्डिङ सेन्टरमा रहेका विस्थापितहरूको अवस्थाप्रति सरकारको ध्यानाकर्षण गराउँदै त्यहाँ रहेका बालबालिका एक छाक खानासमेत नपाएर भोकै बस्नुपर्ने र वृद्धवृद्धा बिरामी अवस्थामा रहेको उल्लेख गरे। उनीहरूको खाद्यान्न, स्वास्थ्य उपचार तथा अन्य आधारभूत आवश्यकताको तत्काल व्यवस्था गर्न उनले सरकारसँग आग्रह गरे।

त्यसैगरी, मुगुका २५ वर्षीय गणेश नेपालीले काठमाडौंमा आत्मदाह गरेको घटनाप्रति दुःख व्यक्त गर्दै शर्माले यस्ता घटनाले नागरिकमा राज्य र नेतृत्वप्रतिको विश्वास कमजोर बन्दै गएको संकेत गरेको बताए। उनले यसअघि व्यवसायी प्रेम आचार्यको आत्मदाहको घटनालाई पनि स्मरण गर्दै यस्ता दुःखद घटनाको कारणबारे गम्भीर समीक्षा आवश्यक रहेको बताए।

“हिजो प्रेम आचार्यले आत्मदाह गर्नुभयो, आज फेरि गणेश नेपालीले आत्मदाह गर्नुभयो। नेतृत्वप्रतिको विश्वास किन घट्दै गएको छ भन्ने विषयमा सबैले गम्भीर भएर सोच्नुपर्छ,” उनले भने।

शर्माले आत्मदाहजस्ता घटनालाई कुनै राजनीतिक चश्माबाट हेर्न नहुने भन्दै समाजमा बढ्दो निराशा, असन्तुष्टि र राज्यप्रतिको भरोसा कमजोर बन्दै गएको सन्देशका रूपमा लिनुपर्ने धारणा व्यक्त गरे। उनले नागरिकमा आशा र विश्वास कायम गर्न सरकार, राजनीतिक दल, प्रशासन तथा नागरिक समाजबीच सहकार्य अपरिहार्य रहेको बताए।

उपसभापति शर्माले मानवीय संवेदनासँग जोडिएका विषयमा सबै पक्ष जिम्मेवार बन्नुपर्नेमा जोड दिँदै सरकारलाई पीडितको पक्षमा तत्काल प्रभावकारी निर्णय लिन आग्रह गरेका छन्।