कोशी प्रदेशकै सर्वोत्कृष्ट प्रहरी बने मोरङ ट्राफिक प्रमुख न्यौपाने

विराटनगर । कोशी प्रदेश प्रहरी कार्यालय विराटनगरले जिल्ला ट्राफिक प्रहरी कार्यालय मोरङका प्रमुख प्रहरी निरीक्षक सन्तोष न्यौपानेलाई २०८३ साल जेठ महिनाको कोशी प्रदेशस्तरीय ‘सर्वोत्कृष्ट प्रहरी’ (वेस्ट पुलिस अफ द मन्थ) घोषणा गरेको छ ।

कोशी प्रदेशका १४ जिल्लामा कार्यरत प्रहरी कर्मचारीमध्ये उत्कृष्ट कार्यसम्पादनका आधारमा न्यौपाने सर्वोत्कृष्ट प्रहरी घोषित भएका हुन् ।

कोशी प्रदेश प्रहरी कार्यालयले मंगलबार जारी गरेको सूचनाअनुसार विभागीय मूल्य–मान्यता, आदेश तथा निर्देशनको पालना गर्दै उच्च मनोबल, व्यावसायिकता र जिम्मेवारीका साथ कार्यसम्पादन गरेको मूल्यांकनका आधारमा उनलाई उक्त सम्मान प्रदान गरिएको हो ।

जिल्ला ट्राफिक प्रहरी कार्यालय मोरङको नेतृत्व सम्हाल्दै आएका प्रहरी निरीक्षक न्यौपानेले सवारी दुर्घटना न्यूनीकरणका लागि चालक तथा सहचालकको स्वास्थ्य परीक्षण, लागू पदार्थ तथा मादक पदार्थ सेवन (लापसेरमापसे) परीक्षण अभियान सञ्चालन गर्नुका साथै ट्राफिक नियम उल्लङ्घन गर्ने सवारी चालकलाई कारबाहीको दायरामा ल्याउने कार्यमा सक्रिय भूमिका निर्वाह गरेका थिए ।

उनकै नेतृत्वमा सिटी सफारीलाई सुरक्षित, अनुशासित र मर्यादित बनाउन ‘सुरक्षित चालक अभियान’ सञ्चालन गरिएको थियो । सेवाग्राहीको सुविधाका लागि कार्यालय परिसरमा प्रतिक्षालय निर्माण गर्नुका साथै ट्राफिक तथा पार्किङ व्यवस्थापनलाई प्रभावकारी बनाउन सम्बन्धित निकायसँग समन्वय गरी ह्विल लक, चेन लक, ‘नो पार्किङ’ बोर्ड, ट्राफिक कोन, ब्यारेकेड तथा रिफ्लेक्टिभ ज्याकेट प्रयोगमा ल्याइएको थियो ।

प्रहरीका अनुसार न्यौपानेले समुदायस्तरमा निरन्तर ट्राफिक सचेतनामूलक कार्यक्रम सञ्चालन गरी सडक सुरक्षाबारे जनचेतना अभिवृद्धिमा योगदान पु¥याएका छन् ।

त्यस्तै, ‘जेनजी’ आन्दोलनका क्रममा क्षति पुगेका ट्राफिक लाइट तथा वार्निङ सोलार लाइट पुनः जडान गरी सवारी आवागमन व्यवस्थापनलाई सहज बनाउन उनले उल्लेखनीय भूमिका खेलेका थिए ।

सवारी दुर्घटना न्यूनीकरण, ट्राफिक व्यवस्थापन सुधार, सेवाग्राहीमैत्री वातावरण निर्माण तथा सडक सुरक्षा प्रवद्र्धनमा पु¥याएको योगदानको उच्च मूल्यांकन गर्दै प्रहरी निरीक्षक न्यौपानेलाई २०८३ साल जेठ महिनाको कोशी प्रदेशकै सर्वोत्कृष्ट प्रहरी घोषणा गरिएको कोशी प्रदेश प्रहरी कार्यालयले जनाएको छ ।