प्रधानमन्त्री बालेन शाहको सीमा सम्बन्धी अभिव्यक्तिप्रति नेकपाको आपत्ति, भन्यो– ‘गम्भीर राष्ट्रघात’

काठमाडौं । नेपाल कम्युनिष्ट पार्टी (नेकपा) ले प्रधानमन्त्री बालेन शाहले प्रतिनिधि सभामा व्यक्त गरेको नेपाल–भारत सीमा सम्बन्धी अभिव्यक्तिप्रति कडा आपत्ति जनाएको छ। पार्टीका प्रवक्ता प्रकाश ज्वाला ले जारी गरेको विज्ञप्तिमा प्रधानमन्त्रीको भनाइ गैरजिम्मेवारपूर्ण, राष्ट्रिय सार्वभौमसत्ता तथा भौगोलिक अखण्डताको प्रतिकूल रहेको उल्लेख गरिएको छ।

नेकपाले भारतद्वारा कालापानी, लिपुलेक र लिम्पियाधुरा क्षेत्रमा हुँदै आएको अतिक्रमणको ऐतिहासिक तथ्यलाई तोडमोड गर्दै नेपालले पनि भारतको भूमि कब्जा गरेको भन्ने अभिव्यक्ति गम्भीर राष्ट्रघात भएको दाबी गरेको छ। विज्ञप्तिमा अन्तर्राष्ट्रिय सीमा अतिक्रमण र सीमावर्ती क्षेत्रमा हुने जग्गाको भोगचलन वा अदल–बदललाई फरक विषयका रूपमा व्याख्या गर्दै कुनै देशले अर्को देशको स्वामित्वमा रहेको भूभागमा अनधिकृत रूपमा कब्जा जमाउनु नै अतिक्रमण हुने स्पष्ट पारिएको छ।

पार्टीले सुगौली सन्धि र सीमा स्तम्भका आधारमा निर्धारण गरिएको नेपाल–भारत सीमाका कारण कतिपय नागरिकको खेतीयोग्य जमिन वा सम्पत्ति सीमाको दुवैतर्फ पर्न सक्ने भए पनि त्यसलाई कब्जा भन्न नमिल्ने जनाएको छ। त्यस्तो अवस्था सामान्य भोगचलनको विषय मात्र भएको नेकपाको तर्क छ।

विज्ञप्तिमा देशको कार्यकारी प्रमुखले संसद्को रोस्ट्रमबाट राष्ट्रिय स्वाधीनतामाथि प्रहार गर्ने खालको अभिव्यक्ति दिएको भन्दै संविधानको मर्मविपरीत कार्य भएको आरोप लगाइएको छ। साथै, नेपालले भारतको कुनै भूभाग कब्जा नगरेको तथ्यका आधारमा नै लिम्पियाधुरा, कालापानी र लिपुलेक क्षेत्रलाई समेटेर नयाँ राजनीतिक तथा प्रशासनिक नक्सा जारी गरिएको स्मरण गराइएको छ।

नेकपाले नेपाल–भारत सीमा विवाद कूटनीतिक माध्यमबाट समाधान हुनुपर्ने आफ्नो अडान दोहोर्याउँदै सीमा समस्याको समाधानका लागि गठित प्रबुद्ध व्यक्ति समूह (EPG) को प्रतिवेदन भारतले हालसम्म सार्वजनिक नगरेको विषय पनि उठाएको छ।

पार्टीले प्रधानमन्त्रीको उक्त अभिव्यक्ति तत्काल सच्याउन, संसद्को अभिलेखबाट हटाउन तथा राष्ट्रिय हितका विषयमा सबै राजनीतिक दलबीच सहमति कायम गरी तथ्यका आधारमा भारतसँग कूटनीतिक संवाद अघि बढाउन सरकारसँग माग गरेको छ।