राष्ट्र निर्माणमा बहुदलीय जनवादको भूमिका महत्वपूर्ण : पूर्वराष्ट्रपति भण्डारी

बहुदलीय प्रणाली र राष्ट्रिय एकतामा जोड दिँदै विद्यादेवी भण्डारीद्वारा मदन भण्डारीको योगदानको स्मरण

काठमाडौं । पूर्वराष्ट्रपति विद्यादेवी भण्डारीले जननेता मदन भण्डारीको ७५औँ जन्मजयन्तीका अवसरमा बहुदलीय प्रणाली, सामाजिक सद्भाव र राष्ट्रिय एकताको महत्वमा जोड दिएकी छन् ।

सोमबार आयोजित कार्यक्रममा बोल्दै उनले मदन भण्डारीलाई राष्ट्रवादी र दूरदृष्टि भएका नेताका रूपमा स्मरण गर्दै भौतिक रूपमा गुमाएको तीन दशकभन्दा बढी समय बितिसक्दा पनि नेपाली जनजीवनमा उनी भावनात्मक र राजनीतिक रूपमा जीवित रहेको बताइन् ।

उनले भनिन्, ‘मदन भण्डारीज्यूलाई भौतिक रुपमा गुमाएको ३० वर्ष बढी भइसकेको छ । तर पनि भावनात्मक रुपमा र राजनीतिक हिसावले नेपाली जनजीवनमा उहाँ जीवन्त नै रहनु भएको छ । उहाँ एउटा राष्ट्रवादी र दूरदृष्टि भएको नेता हो । त्यसैको मार्गदर्शनमा नै अहिलेसम्म नेपालको कम्युनिस्ट आन्दोलन एक ढंगले संगठित र सशक्त ढंगले रहेको छ ।’

उनले भण्डारीकै मार्गदर्शनका कारण नेपालको कम्युनिस्ट आन्दोलन संगठित र सशक्त रूपमा अघि बढिरहेको धारणा व्यक्त गरिन् ।

पूर्वराष्ट्रपति भण्डारीले बहुदलीय प्रणाली, सामाजिक सद्भाव र राष्ट्रिय एकता वर्तमान सन्दर्भमा अत्यन्त महत्वपूर्ण विषय भएको उल्लेख गर्दै विश्वमा विभिन्न राजनीतिक दर्शनहरू प्रचलनमा रहे पनि जनताको बहुदलीय जनवादकै आधारमा देशको आवश्यकता अनुसार अघि बढ्नुपर्ने बताइन् ।

साथै, देशको वर्तमान गतिलाई ध्यानमा राख्दै यी विषयमा गम्भीर अध्ययन गरी राष्ट्रिय हितअनुसार नीतिहरू तय गर्नुपर्नेमा जोड दिइन् ।

उनले भनिन्, ‘बहुदलीय प्रणाली सामाजिक सद्भाव र राष्ट्रिय एकता निकै महत्वपूर्ण विषय छ । संसारमा धेरै दर्शन चलेका छन् । धेरै दर्शनलाई मानिसहरुले र देशहरुले अनुशरण गरिरहेको अवस्थामा जनताको बहुदलीय जनवादमै आधारित रहेर जबजकै आधारमा सामाजिक एकता सद्भाव र राष्ट्र निर्माण भन्दा पनि बहुदलीय प्रणाली, सामाजिक सद्भाव र राष्ट्रिय एकता सम्बन्धि कार्यक्रम गरेको हो जस्तो लाग्छ । आज देश जुन गतिमा गइरहेको छ त्यसलाई हेरेर वा राम्रोसँग अध्ययन गरेर देशको आवश्यकता अनुसार अगाडि बढ्नुपर्ने छ ।’

भण्डारीले विश्वमा विभिन्न राजनीतिक दर्शनहरू प्रचलनमा रहेपनि जनताको बहुदलीय जनवाद (जबज) कै आधारमा देशलाई अघि बढाउनुपर्ने धारणा राखिन् । उनले यस्ता विषयलाई समग्र रूपमा हेरेर कार्यक्रम आयोजना गरिएको जस्तो लागेको पनि बताइन् ।