सेतो खबर
काठमाडौं । राष्ट्रिय स्वतन्त्र पार्टी (रास्वपा)को प्रथम महाधिवेशनअन्तर्गत उपसभापति पदमा स्वर्णिम वाग्ले निर्विरोध निर्वाचित भएका छन्।
पुरुषतर्फको एक उपसभापति पदका लागि उम्मेदवारी दिएका विराजभक्त श्रेष्ठले आफ्नो दाबी फिर्ता लिएपछि वाग्ले निर्विरोध निर्वाचित भएका हुन्। विशेष कुरा, श्रेष्ठ स्वयं वाग्लेको प्रस्तावक बनेका छन्, जसले पार्टीभित्रको सहमतिको संकेत गरेको छ।
रास्वपाको विधानअनुसार एक सभापति, दुई उपसभापति, एक महामन्त्री तथा तीन सहमहामन्त्री पदका लागि निर्वाचन हुने व्यवस्था रहेको छ। यसअघि सभापति पदमा रवि लामिछाने निर्विरोध निर्वाचित भइसकेका छन्।
उपसभापतिमा वाग्ले निर्विरोध भएपछि अब महाधिवेशनको ध्यान महामन्त्री, महिला उपसभापति तथा सहमहामन्त्री पदको निर्वाचनतर्फ केन्द्रित भएको छ। ती पदहरूमा भने प्रतिस्पर्धा हुने अपेक्षा गरिएको छ।
चितवनमा जारी महाधिवेशनमार्फत रास्वपाले नयाँ नेतृत्व चयन गर्दै आगामी संगठन विस्तार र राजनीतिक रणनीतिलाई अघि बढाउने तयारी गरेको छ।
काठमाडौं । भावी प्रधानन्यायाधीश नियुक्तिका लागि सिफारिस गर्ने उद्देश्यले आज संवैधानिक परिषद्को बैठक बस्दैछ। परिषद्का अध्यक्ष तथा प्रधानमन्त्री बालेन्द्र शाह... विस्तृतमा
