सेतो खबर
लमजुङ — नेपाली राष्ट्रिय महिला फुटबल टोलीकी स्टार स्ट्राइकर सावित्रा भण्डारी ‘साम्बा’ ले न्युजिल्याण्डबाट आफ्नो उपचारका लागि आर्थिक सहयोगको अपिल गरेकी छन्।
साम्बा सिजन २०२५–२६ का लागि गत साउनमा न्युजिल्याण्डको क्लब वेलिङ्टन फोनिक्ससँग आबद्ध भएकी थिइन्। उत्कृष्ट प्रदर्शन गर्दै आएकी उनी पुस ५ गते अस्ट्रेलियाको महिला फुटबल लिग अन्तर्गत ब्रिस्बेन रोअरविरुद्धको खेलमा घाइते भएकी थिइन्।
खेलको दोस्रो हाफमा हावामा आएको बल हेड गर्न जाँदा साम्बा र रोअरकी गोलकिपर एकआपसमा ठोक्किँदा उनको दाहिने घुँडामा गम्भीर चोट लागेको थियो। प्रारम्भिक परीक्षणमा घुँडाको एसीएल (ACL) मा पहिले राखिएको ग्राफ्ट तथा एमसीएल (MCL) दुवैमा क्षति पुगेको पुष्टि भएको छ।
चोट जटिल प्रकृतिको भएकाले पुनः शल्यक्रिया आवश्यक परेको उनले जानकारी दिएकी छन्। हालसम्म शल्यक्रिया हुन नसकेको र उपचार खर्च जुटाउन कठिनाइ भएको उनले बताएकी छन्। प्रारम्भिक अनुमान अनुसार उपचारमा करिब ८० हजार अमेरिकी डलर (नेपाली १ करोड १५ लाख रुपैयाँभन्दा बढी) खर्च लाग्ने सम्भावना रहेको छ।
साम्बाले सामाजिक सञ्जाल फेसबुकमार्फत समर्थकहरूलाई भावुक सन्देश दिँदै भनेकी छन्, “म चोटपछिको उपचारका लागि भौंतारिरहेकी छु। अहिले ७ हप्तादेखि मैदानबाहिर छु। घुँडाको एसीएलमा पहिलेको शल्यक्रियामा राखिएको ग्राफ्ट र एमसीएल दुवैमा चोट लागेको छ। यसपटक पुनः जटिल शल्यक्रियाको आवश्यकता परेकाले आर्थिक सहयोगको अपिल गर्नु परेको हो।”
नेपाली महिला फुटबलमा महत्वपूर्ण योगदान दिएकी साम्बाको शीघ्र स्वास्थ्यलाभको कामना गर्दै समर्थकहरूले सामाजिक सञ्जालमार्फत साथ र समर्थन जनाउन थालेका छन्।
काठमाडौं । भावी प्रधानन्यायाधीश नियुक्तिका लागि सिफारिस गर्ने उद्देश्यले आज संवैधानिक परिषद्को बैठक बस्दैछ। परिषद्का अध्यक्ष तथा प्रधानमन्त्री बालेन्द्र शाह... विस्तृतमा
