अभिनेत्री नीति शाहले गरिन् विवाह

काठमाडौँ । नेपाली चलचित्र क्षेत्रकी अभिनेत्री तथा मोडल नीति शाह विवाह बन्धनमा बाँधिएकी छन् । उनले शुक्रबार एरोस्पेस इन्जिनियर याञ्चित राणासँग परम्परागत विधिअनुसार विवाह गरेकी हुन् ।

झम्सिखेलस्थित न्यु प्लाजामा भइरहेको वैवाहिक समारोहमा दुवै पक्षका परिवारजन, आफन्त तथा नजिकका साथीभाइको उपस्थिति रहेको छ । समारोहलाई पारिवारिक र सादगीपूर्ण रूपमा आयोजना गरिएको स्रोतले जनाएको छ ।

यसअघि नै उनीहरूले गत वैशाखमा काठमाडौँ जिल्ला अदालतमा कानुनी रूपमा विवाह दर्ता गरेका थिए । न्यायाधीश दिनबन्धु बरालको इजलासमा उनीहरूको विवाह सम्पन्न भएको थियो ।

नीति र याञ्चित करिब दुई वर्षभन्दा बढी समयदेखि प्रेम सम्बन्धमा रहेका थिए । प्रेम सम्बन्धलाई वैवाहिक सम्बन्धमा रूपान्तरण गर्दै उनीहरूले नयाँ जीवन यात्रा सुरु गरेका हुन् ।

‘मिस नेपाल इन्टरनेशनल २०१७’ को उपाधि जितेकी नीतिले खजुरे ब्रोबाट अभिनय यात्रा सुरु गरेकी हुन् । त्यसपछि उनले ज्वाइँ साब र नरसिंहा अवतारलगायत चलचित्रमा अभिनय गर्दै नेपाली फिल्म क्षेत्रमा आफ्नो स्थान बनाएकी छन् ।

नवविवाहित जोडीलाई सुखद दाम्पत्य जीवनको हार्दिक शुभकामना ।