रीना डंगोल नेपाल टेलिकमको निमित्त प्रबन्ध निर्देशक नियुक्त

काठमाडौँ । नेपाल दूरसञ्चार कम्पनी लिमिटेड (नेपाल टेलिकम) को निमित्त प्रबन्ध निर्देशकमा रीना डंगोल नियुक्त हुनुभएको छ। सम्माननीय प्रधानमन्त्री तथा सञ्चार तथा सूचना प्रविधि मन्त्रीस्तरीय मिति २०८२।१०।२२ को निर्णयअनुसार सञ्चार तथा सूचना प्रविधि मन्त्रालयले मिति २०८२।१०।२३ मा जारी गरेको नियुक्ति पत्रमार्फत उहाँलाई उक्त जिम्मेवारी दिइएको हो।

डंगोलले बंगलादेश युनिभर्सिटीबाट इलेक्ट्रोनिक्स एन्ड इलेक्ट्रिकल विषयमा बीई अध्ययन पूरा गर्नुभएको छ। उहाँले २०५१ जेठ १ गते तत्कालीन नेपाल दूरसञ्चार संस्थानमा इन्जिनियर पदबाट सेवा प्रवेश गरी २०५२ जेठ ९ मा स्थायी नियुक्ति पाउनुभएको थियो।

यसअघि उहाँ २०८० जेठ ३२ देखि नेपाल टेलिकमको नायव प्रबन्ध निर्देशकका रूपमा कार्यरत रहनुभएको थियो। प्रादेशिक निर्देशनालय विराटनगर र काठमाडौँ तथा वायरलाइन तथा ग्राहक सेवा निर्देशनालयको निर्देशकको जिम्मेवारी समेत सम्हालिसक्नुभएको उहाँ हाल प्रमुख प्राविधिक अधिकृतको रूपमा कार्यरत हुनुहुन्थ्यो।

पदभार ग्रहण गर्दै डंगोलले सरकारको विश्वासप्रति धन्यवाद व्यक्त गर्दै कम्पनीलाई ग्राहक–केन्द्रित, प्रविधिमैत्री र आर्थिक रूपमा सक्षम बनाउँदै सार्वजनिक दायित्व र प्रतिस्पर्धात्मक क्षमतालाई सन्तुलित रूपमा अघि बढाउने बताउनुभएको छ।