टिकटकर रतन कार्की चितवन प्रहरीको नियन्त्रणमा

चितवन। प्रतिनिधि सभा निर्वाचनको मौन अवधिमा विभिन्न उम्मेदवारहरूको पक्षमा प्रचारात्मक सामग्री सार्वजनिक गरेको आशंकामा टिकटक तथा युट्युबमा सक्रिय रतन कार्कीलाई प्रहरीले नियन्त्रणमा लिएर सोधपुछ गरेको छ।

जिल्ला प्रहरी कार्यालय चितवनका अनुसार मौन अवधिमा सामाजिक सञ्जालमार्फत प्रचार गरिएको भिडियो र तस्बिरबारे अनुसन्धान गर्न कार्कीलाई बोलाएर सोधपुछ गरिएको हो। सोधपुछपछि उनलाई छोडिएको प्रहरीले जनाएको छ।

प्रहरीले अनुसन्धानका क्रममा कार्कीले टिकटक, फेसबुकलगायत प्लेटफर्ममा पोस्ट गरेका प्रचारात्मक सामग्री आचारसंहिता विपरीत देखिएको भन्दै हटाउन निर्देशन दिएको थियो। उक्त निर्देशनपछि सम्बन्धित सामग्री हटाइएको जिल्ला प्रहरी कार्यालयले जानकारी दिएको छ।

निर्वाचन आचारसंहिताअनुसार मौन अवधिमा कुनै पनि उम्मेदवार वा दलको पक्षमा प्रचार–प्रसार गर्न पाइँदैन। सामाजिक सञ्जालमा गरिने प्रत्यक्ष वा अप्रत्यक्ष प्रचारसमेत आचारसंहिताको दायराभित्र पर्छ।

कार्की केही वर्षदेखि जापानमा बस्दै आएका थिए। केही दिनअघि मात्र नेपाल फर्किएका उनले चुनावी माहोलसँग सम्बन्धित भिडियोहरू नियमित रूपमा सार्वजनिक गर्दै आएका थिए। ती सामग्री निर्वाचन आचारसंहिता उल्लंघनको रूपमा मूल्यांकन भएपछि प्रहरी अनुसन्धानमा तानिएको हो।

यस घटनाले सामाजिक सञ्जाल प्रयोगकर्ताहरूलाई मौन अवधिमा सामग्री पोस्ट गर्दा कानुनी प्रावधानबारे सजग रहनुपर्ने सन्देश दिएको छ।