प्रधानमन्त्री कार्कीको प्रमुख आतिथ्यतामा प्रहरी निरीक्षक आधारभूत तालिम दीक्षान्त सम्पन्न

काठमाडौँ । प्रधानमन्त्री सुशीला कार्कीको प्रमुख आतिथ्यतामा राष्ट्रिय प्रहरी प्रशिक्षण प्रतिष्ठान, महाराजगंजमा सोमबार प्रहरी निरीक्षक आधारभूत तालिम १–१८३औँ (पोष्ट ग्र्याजुएट डिप्लोमा इन पुलिस साइन्स १४औँ समूह) को दीक्षान्त समारोह सम्पन्न भएको छ।

समारोहमा प्रधानमन्त्री कार्कीले तालिममा सर्वप्रथम तथा शारीरिक क्षमता र आत्मबल अभिवृद्धिमा प्रथम हुन सफल प्रशिक्षार्थी प्रहरी निरीक्षक निराजन बस्नेतलाई स्वर्गीय “कुलानन्द विद्या सर्वप्रथम पुरस्कार” प्रदान गर्नुभयो। साथै उहाँले विभिन्न विधामा उत्कृष्टता हासिल गर्ने अन्य प्रशिक्षार्थीहरूलाई पनि पुरस्कार प्रदान गर्नुभयो।

समारोहलाई सम्बोधन गर्दै प्रधानमन्त्री कार्कीले कठिन परिश्रम, अनुशासन र समर्पण भावका साथ तालिम सम्पन्न गरी दीक्षित भएका सम्पूर्ण प्रहरी निरीक्षकहरूलाई बधाई तथा सफल सेवाकालको शुभकामना व्यक्त गर्नुभयो। तालिमका क्रममा विकसित नेतृत्व क्षमता, निर्णय क्षमता र संकट सामना गर्ने अभ्यास पेशागत जीवनका आधार स्तम्भ भएको उल्लेख गर्दै नागरिकलाई सुरक्षाको प्रत्याभूति दिलाउने जिम्मेवारी कुशलतापूर्वक निर्वाह गर्न निर्देशन दिनुभयो।

नेपाल प्रहरी राज्य र नागरिकबीचको पहिलो सम्पर्क बिन्दु भएको उल्लेख गर्दै प्रधानमन्त्री कार्कीले कानुनभन्दा माथि कोही नभए पनि कानुन कार्यान्वयन गर्ने अधिकृतमा शिष्टता, मानवता र व्यावसायिकता अनिवार्य हुनुपर्ने बताउनुभयो। अनुसन्धान स्पष्ट र निष्पक्ष भएमा मात्र कानुनको सही कार्यान्वयन सम्भव हुने उहाँको भनाइ थियो।

परम्परागत अपराधसँगै साइबर, संगठित, वित्तीय तथा बहुदेशीय अपराधका चुनौती बढ्दै गएको उल्लेख गर्दै प्रधानमन्त्री कार्कीले प्रहरीको भूमिका आदेश पालकमा मात्र सीमित नरही विश्लेषक र समाधानकर्ताका रूपमा विकसित हुनुपर्नेमा जोड दिनुभयो। साथै आगामी निर्वाचन स्वतन्त्र, निष्पक्ष र भयमुक्त वातावरणमा सम्पन्न गराउन नेपाल प्रहरीलाई कुनै राजनीतिक प्रभाव वा पूर्वाग्रहबाट माथि उठेर काम गर्न निर्देशन दिनुभयो।

उक्त अवसरमा गृहमन्त्री ओमप्रकाश अर्यालले नेपाल प्रहरी कानुन कार्यान्वयन, अपराध नियन्त्रण, मानवअधिकार संरक्षण तथा विपद् व्यवस्थापनमा महत्वपूर्ण जिम्मेवारी बोकेको संस्था भएको बताउनुभयो। दीक्षित प्रहरी अधिकृतहरू अब राज्यका प्रतिनिधि र जनविश्वासका वाहक भएको उहाँको भनाइ थियो।

समारोहमा धन्यवाद ज्ञापन गर्दै प्रहरी महानिरीक्षक दानबहादुर कार्कीले करिब १९ महिनाको कठोर प्रशिक्षणपछि दीक्षित भएका प्रहरी निरीक्षकहरूलाई बधाई दिँदै नागरिक सेवामा समर्पित नेपाल प्रहरी संगठनमा स्वागत गर्नुभयो।

कार्यक्रममा प्रतिष्ठानका कार्यकारी निर्देशक प्रहरी अतिरिक्त महानिरीक्षक सिद्धी बिक्रम शाहले सपथ ग्रहण गराउनुका साथै तालिमसम्बन्धी प्रतिवेदन प्रस्तुत गर्नुभयो। २०८१ साउन २१ गतेदेखि सुरु भएको उक्त तालिममा ९ महिला सहित कुल ९२ जना प्रहरी निरीक्षक सहभागी रहेको र सबैले सफलतापूर्वक तालिम पूरा गरेको जानकारी दिइयो।

दीक्षान्त समारोहमा उच्च सरकारी अधिकारी, सुरक्षा निकायका प्रमुखहरू, पूर्व प्रहरी महानिरीक्षकहरू, सञ्चारकर्मी तथा दीक्षित प्रशिक्षार्थीका अभिभावकहरूको उपस्थिति रहेको थियो।