खगेन्द्र सुनारको विवादित अभिव्यक्तिमा रास्वपाको गम्भीर ध्यानाकर्षण

काठमाडौँ । बाँके क्षेत्र नम्बर–३ बाट उम्मेदवार बनेका खगेन्द्र सुनारको विवादित अभिव्यक्तिलाई लिएर राष्ट्रिय स्वतन्त्र पार्टी (रास्वपा) ले गम्भीर ध्यानाकर्षण भएको जनाएको छ।

राष्ट्रिय जनावर गाईसम्बन्धी अभिव्यक्तिपछि विवाद उत्पन्न भएपछि शुक्रबार रास्वपाका महामन्त्री कविन्द्र बुर्लाकोटी ले विज्ञप्ति जारी गर्दै समाजमा परेको अन्योल र धार्मिक–सांस्कृतिक भावनामा पुगेको चोटप्रति पार्टीका तर्फबाट क्षमायाचना गरिएको जानकारी दिएका छन्।

विज्ञप्तिमा उम्मेदवार खगेन्द्र सुनार ले आफू शाकाहारी रहेको, कुनै पनि पशु–पंक्षी हत्याको पक्षमा नरहेको तथा राष्ट्रिय जनावर गाईप्रतिको सम्मानमा कुनै द्विविधा नरहेको स्पष्ट पारिसकेको उल्लेख गरिएको छ। सामाजिक सञ्जालमा केही प्रसङ्ग तोडमोड गरी प्रचार गरिएकाले उत्पन्न भ्रम र भावनात्मक ठेसप्रति उनले आत्मालोचना गर्दै क्षमायाचना गरेको पार्टीले जनाएको छ।

पार्टीले सुनारलाई भविष्यमा आफ्ना अभिव्यक्ति र व्यवहारमा थप संयम, परिपक्वता र सार्वजनिक मर्यादा कायम राख्न सचेत गराएको पनि विज्ञप्तिमा उल्लेख छ। साथै उनको उद्देश्य कुनै पनि धर्म, संस्कृति वा राष्ट्रिय प्रतीकको अपमान गर्ने नभएको कुरामा पार्टी आश्वस्त रहेको जनाएको छ।

रास्वपाले नेपालको इतिहास, सनातन सभ्यता तथा धार्मिक–सांस्कृतिक विविधतामा आधारित सह–अस्तित्व र पारस्परिक सम्मानलाई आफ्नो मूल मर्म मानेको उल्लेख गर्दै विधिको शासन, सामाजिक न्याय र सामाजिक सद्भाव कायम राख्दै समावेशी समाज निर्माणमा प्रतिबद्ध रहेको स्पष्ट पारेको छ।