सुनको मुल्यमा ऐतिहासिक रेकर्ड कायम, प्रतितोला ३ लाख नाघ्यो

काठमाडौँ । स्थानीय बजारमा आज सुनचाँदीको मूल्यले नयाँ कीर्तिमान कायम गरेको छ। बिहीबारको तुलनामा आज प्रतितोला सुन ९ हजार २०० रुपैयाँले र चाँदी ३२० रुपैयाँले बढेको हो।

नेपाल सुनचाँदी व्यवसायी महासङ्घका अनुसार आज एक तोला छापावाल सुनको मूल्य ३ लाख १ हजार ४०० रुपैयाँ पुगेको छ। त्यस्तै, चाँदीको मूल्य प्रतितोला ६ हजार १९० रुपैयाँ कायम भएको छ।

यसअघि गत बुधबार छापावाल सुन प्रतितोला २ लाख ९५ हजार १०० रुपैयाँ र चाँदी ५ हजार ९२० रुपैयाँमा कारोबार भएको थियो। मङ्गलबार सुनको मूल्य २ लाख ८४ हजार ७०० रुपैयाँ तथा चाँदी ५ हजार ८८० रुपैयाँ रहेको थियो।

त्यसैगरी, गत आइतबार सुन प्रतितोला २ लाख ७८ हजार ८०० रुपैयाँ र चाँदी ५ हजार ६२५ रुपैयाँमा कारोबार भएको थियो भने सोमबार सुन २ लाख ८२ हजार रुपैयाँ र चाँदी ५ हजार ८१० रुपैयाँमा किनबेच भएको थियो।

अन्तरराष्ट्रिय सञ्चारमाध्यमहरूका अनुसार आज अन्तरराष्ट्रिय बजारमा एक औँस सुन ४ हजार ९६० अमेरिकी डलर र चाँदी ९८ अमेरिकी डलरमा कारोबार भइरहेको छ।