महाधिवेशन प्रतिनिधिलाई रक्षा बमको खुल्लापत्रः केपी ओलीको हात हाम्रो पुस्ताको रगले रंगिएको छ, के तपाईहरु पनि त्यसको भागीदार बन्न तयार हुुनुहुन्छ ?

काठमाडौँ । नेकपा (एमाले) को महाधिवेशन चलिरहेका बेला जेनजी फ्रन्टकी संयोजक रक्षा बमले महाधिवेशन प्रतिनिधिहरूलाई खुला पत्र लेख्दै तत्कालीन सरकारको नेतृत्व गरेका एमाले अध्यक्ष केपी शर्मा ओलीको नैतिकतामाथि गम्भीर प्रश्न उठाएकी छन्।

विशेष परिस्थितिमा समयभन्दा एक वर्षअघि भइरहेको महाधिवेशनले पार्टी मात्र होइन, देशकै सबैभन्दा ठूलो दलको नेतृत्व चयन गरिरहेको उल्लेख गर्दै बमले प्रतिनिधिहरूको मतको ऐतिहासिक महत्त्व रहेको बताएकी छन्।

खुला पत्रमा उनले सेप्टेम्बर ८ अर्थात् भदौ २३ को घटनालाई स्मरण गराउँदै उक्त दिन जेनजी पुस्ता संवैधानिक अधिकार प्रयोग गर्दै सडकमा उत्रिँदा निहत्था विद्यार्थीहरूमाथि गोली चलाइएको र कलिला युवाहरूको हत्या भएको आरोप लगाएकी छन्।

उनले उक्त घटनाका बेला सरकारको नेतृत्व एमाले अध्यक्ष ओलीले गरेको उल्लेख गर्दै पार्टी नेतृत्वले अहिलेसम्म माफी नमागेको बरु पीडित पुस्तामाथि गिज्याउने र धम्क्याउने अभिव्यक्ति दिइरहेको आरोप लगाएकी छन्।

रक्षा बमले यो समय महाधिवेशन प्रतिनिधिहरूको नैतिकता र देशप्रेमको परीक्षा भएको बताउँदै प्रश्न गरेकी छन्, “केपी शर्मा ओलीको हात हाम्रो पुस्ताको रगतले रङ्गिएको छ, के त्यसको जिम्मेवारी तपाईंहरू पनि लिन तयार हुनुहुन्छ?”

उनले यो महाधिवेशन एमाले पार्टीलाई सच्याउने र प्रतिनिधिहरू स्वयं ‘युगान्तकारी परिवर्तनका संवाहक’ बन्ने अन्तिम अवसर हुनसक्ने चेतावनी दिँदै अन्त्यमा आग्रह गरेकी छन्, “मन एकातिर र मत एकातिर नहोस्, फेरि भदौ २३ नदोहोरिने नेतृत्व चयन गर्नुस्।”

उनले सामाजिक सञ्जालमा लेखेकी छन्:

आदरणीय एमाले महाधिवेशन प्रतिनिधी ज्यूहरु,

बिशेष परिस्थितिमा नियमित समयभन्दा १ बर्ष अगाडी नै हुदैगरेको नेकपा एमालेको महाधिवेशनमा हामी तपाईहरूको मत पर्खेर बसेका छौं।

निकै रस्साकस्सीबिच तपाईहरु महाधिवेशन प्रतिनिधी चुनिएर आउनुभएको कुरा बिभिन्न सन्चारमाध्यमहरुबाट हामीले थाहापाएका छौं।अब तपाईहरुको हातमा एउटा अभिभारा आईपरेको छ । तपाईहरुले आफ्नो नेता, आफ्नो पार्टीको अध्यक्ष मात्र नभई, देशकै ठूलो मध्यको एउटा दलको अध्यक्ष र अन्य पदाधिकारीहरु पनि छान्दै हुनुहुन्छ । तपाईहरुको भोटले तपाईहरुको पार्टीको कार्यदिशा र मार्गनिर्देशन तय गर्नेछ।

र यतिखेर हामी तपाईहरु सबैलाई पुनश्चः सेप्टेम्बर ८ अर्थात भदौ २३ सम्झाउन चाहन्छौ । भदौ २३ एउटा सामान्य मितिमात्र थिएन। त्यस दिन तानाशाही व्यवस्थाबिरुद्ध, आफ्नो संवैधानिक हकका खातिर संवैधानिक अधिकारको प्रयोग गर्दै, एउटा उमेर समूह अर्थात जेन जी पुस्ता सडकमा उत्रिएको थियो । तर निरंकुश सरकारले निहत्था बिद्यार्थीहरुमाथि गोली बर्षायो । कलिला युवाहरु जो सुन्दर भविष्यका सपना देखिरहेका थिए, उनीहरुको हत्या गर्यो । कयौं बिद्यार्थीहरुलाई घाईते बनायो ।र तपाईहरुलाई पुनश्चः स्मरण गराऔं, त्यस तत्कालिन सरकारको नेतृत्व तपाईहरुकै पार्टीको अध्यक्षले गर्नुभएको थियो, तपाईहरूले गर्नुभएको थियो ।

एमालेका नेतृत्वकर्ताहरूले भदौ २३ को घटनामा एकपटक माफी समेत मागेका छैनन बरु सधैजसो सार्वजनिक अभिव्यक्तिहरुमा गिज्याउँदै त कहिले सार्वजनिक मन्चहरुबाट गुण्डाहरुमार्फत धम्क्याउदै हामीमाथि निरन्तर आक्रमण गराउन कोसिस गरिरहेका छन् । तर हामी यतिखेर शान्तपूर्वक तपाई प्रतिनिधीहरुको मत पर्खेर बसेका छौं। हामी तपाईहरुको नैतिकता हेरिरहेका छौं। हामी तपाईहरुको देशप्रेम र देशका युवाहरुप्रतिको सद्भाव, महाधिवेशनको व्यालेट बक्समा कसरी खस्छ, त्यो कुरिरहेका छौं।

आदरणीय प्रतिनिधी ज्यूहरु, यतिखेर सबैभन्दा प्रमुख प्रश्न हो, केपी शर्मा ओलीको हात त हाम्रो पुस्ताको रगतले रंगिएको छ,के त्यो रगतको भागीदारिता तपाईहरु पनि वहन गर्न तयार हुनुहुन्छ ? त्यसैले पनि सम्भवतः यो एउटा अन्तिम अवसर हो । तपाईको पार्टीलाई सच्याउने, तपाईहरू पनि सच्चिने र युगान्तकारी परिवर्तनको संवाहक बन्ने यो अवसर तपाईहरुले गुमाउनुभयो भने, तपाईहरुको पार्टीमात्र नभई देशको भविष्य नै अन्धकार हुनेछ । तपाईहरूको मन एकातिर मत एकातिर नहोस्। यसपटक यस्तो नेतृत्व छनोट गर्नुस् जसले फेरि भदौ २३ ननिम्त्याओस्।

एउटा तानाशाही शासकको अहंकारी गोलीबाट बाँचेकी, एक जेन जी आन्दोलनकारी।