पुर्व गृहमन्त्री रमेश लेखकको जवाफः बिषम परिस्थितिले बल प्रयोग भयो, मेरो कुनै दोष छैन

काठमाडौं । पूर्व गृहमन्त्री रमेश लेखकले भदौ २३ गते जेनजी आन्दोलनका क्रममा प्रदर्शनकारीहरू मृत्युवरण तथा घाइते हुनुपरेको घटनामा आफूको कुनै प्रत्यक्ष संलग्नता नभएको स्पष्ट पारेका छन्। जेनजी आन्दोलनमा दमन गर्नेहरूलाई पक्राउ गरी कारबाही गर्नुपर्ने मागसहित सर्वोच्च अदालतमा दर्ता भएको रिटमा उनले लिखित जवाफसहित यो धारणा प्रस्तुत गरेका हुन्।

रिटमा दमनका जिम्मेवारहरूलाई कारबाही गर्न माग गरिएकाे थियो। तर लेखकले आफ्नो तर्फबाट २१ जनाको ज्यान जानेगरी भएको बल प्रयोगको जिम्मा लिन अस्वीकार गरेका छन्।

लिखित जवाफमा उनले भनेका छन्, “गृहमन्त्रीमा बहाल रहँदासम्म पदको जिम्मेवारी पूरा गर्ने क्रममा विषम परिस्थिति र हिंसात्मक गतिविधि उत्पन्न भयो। त्यसमा मेरो कुनै भूमिका नरहेकाले रिट खारेज गरियोस्।”

लेखकले भदौ २२ गते बेलुकी बसेको केन्द्रीय सुरक्षा समितिको बैठकमा सुरक्षा निकायका प्रमुखहरूले प्रदर्शन शान्तिपूर्ण हुने विश्वास व्यक्त गरेको र हताहति हुन नदिन न्यूनतम बल प्रयोग गर्न निर्देशन दिएको बताएका छन्।

उनका अनुसार बानेश्वरस्थित संसद भवन वरपर ‘घुसपैठ’ भएकाले प्रदर्शन उग्र र हिंसात्मक बन्दै गएपछि अकल्पनीय घटना भएको हो।

त्यसैदिन भएको २१ जनाको मृत्युप्रति गहिरो दुःख व्यक्त गर्दै उनले नैतिक जिम्मेवारीस्वरूप गृहमन्त्री पदबाट तत्काल राजीनामा दिएको उल्लेख गरेका छन्।

भदौ २४ गतेपछि घटित घटनामा आफूलाई जिम्मेवार ठहर गर्न नमिल्ने दाबी गर्दै उनले थप भनेका छन्, “प्रधानमन्त्रीलाई समझ दिई राजीनामा देिइसकेको हुँदा भदौ २४ गतेका घटनामा मेरो कुनै पदीय भूमिका रहँदैन।”

सर्वोच्च अदालतले अब रिट निवेदनमाथि आगामी कदम तय गर्नेछ।