सेतो खबर
काठमाडौँ । लैङ्गिक तथा यौनिक अल्पसङ्ख्यक समुदायको नेतृत्वमा पहिलो पटक निर्वाचन आयोगमा दल दर्ताको निवेदन दर्ता भएको छ। तेस्रोलिंगी अधिकारकर्मी नुमा लिम्बु चञ्चलाको अध्यक्षतामा २१ सदस्यीय केन्द्रीय कार्य समितिले आयोगमा दल दर्ता गरिदिन निवेदन दिएको हो।
संविधान सभा सदस्य एवं मायाको पहिचान नेपालका कार्यकारी निर्देशक सुनिल बाबु पन्तको नेतृत्वमा आयोग पुगेर दल दर्ताको निवेदन दर्ता गराइएको छ।
फागुन २१ गते तोकिएको प्रतिनिधिसभा सदस्य निर्वाचनमा भाग लिन पाउने गरी प्रक्रिया अगाडि बढाइदिन समाजवादी समावेशी पार्टी (ससपा)ले आयोगलाई अनुरोध गरेको छ।
फागुन २१ को चुनावमा भाग लिन पाउने गरी निर्वाचन आयोगले नयाँ राजनीतिक दलहरूलाई दर्ताका लागि निवेदन दिन कार्तिक ३० गतेसम्मको समय दिएको छ।
जेनजी आन्दोलनपछि नयाँ दल दर्ताका लागि शुक्रवार मध्यान्हसम्म २७ दलले निवेदन दिएका आयोगले जनाएको छ। नयाँ दलको रूपमा निवेदन दिने ससपा २४औँ दल बनेको छ। २७ गतेसम्म २३ वटा दलले निवेदन दिइसकेका छन्, दल दर्ता फाँटका कर्मचारीले बताए। “यो सहित अर्को एउटा गरेर दुई वटा निवेदन प्राप्त भएका छन्,” कर्मचारीले जानकारी दिए।
नेपालका लैङ्गिक तथा यौनिक अल्पसङ्ख्यक समुदायले पहिलो पटक आफ्नै नयाँ राजनीतिक दल गठन गरेका हुन्। पार्टीमा महिला र अपाङ्गता भएका व्यक्तिहरूको पनि सक्रिय सहभागिता रहेको छ।
“साइबरनेटिक लोकतान्त्रिक सङ्घीयता” सहितको पार्टीको घोषणापत्र २०८२ मा राज्यको शक्ति सिंहदरबारबाट होइन, टोल र वडाबाट सञ्चालन हुने भनिएको छ। प्रविधि र करुणामा आधारित लोकतन्त्र निर्माण गर्ने र शक्ति ‘नेतामा’ होइन, ‘जनतामा’हुने घोषणापत्र सार्वजनिक गरिसकेको छ।
पार्टीको नामअनुरूप ससपाले केन्द्रीय समितिलाई समावेशी बनाएको छ। हुम्ला र कालीकोटबाट समेत केन्द्रीय सदस्य समावेश छन्।आयोगमा ससपाले बुझाएको केन्द्रीय कार्य समितिमा अध्यक्ष झापाकी नुमा लिम्बु, उपाध्यक्ष खोटाङका पवन राई, ललितपुरका समशेर दंगाल क्षेत्री र लमजुङकी बबिता धिताल तामाङ छन्।
ससपाको महासचिव सर्लाहीका मनिन्द्र सिंह दनुवार, सचिव मकवानपुरकी सञ्जीवनी लोप्चन, कोषाध्यक्ष सिन्धुलीका लासाङ दोर्जे बल र प्रवक्ता काठमाडौँकी प्रतीक्षा चापागाई छन्।
ससपाका केन्द्रीय सदस्यहरूमा नवलपुरका चन्द्र बहादुर गुरुङ, मोरङका विवेक मगर, रुपन्देहीका सनरेज पुन, काठमाडौँका श्याम बहादुर राई, कालीकोटका विष्णु सिंह ठकुरी, मकवानपुरका जय बहादुर घलान र हुम्लाका नरेश सुनार छन्। यस्तै, सुनसरीका कृष्ण कुमार तामाङ, नुवाकोटकी भावना क्षेत्री तामाङ, चितवनका देव गुरुङ, गुल्मीकी पार्वती परियार, मकवानपुरका विश्वराज अधिकारी र रुपन्देहीका देवेन्द्र बहादुर खत्री ससपाका केन्द्रीय सदस्य हुन्।
काठमाडौं । इरान र इजरायलबीच चर्किएको युद्ध (जसमा अमेरिका समेत संलग्न छ) ले नेपालजस्तो आयात र रेमिट्यान्समा निर्भर अर्थतन्त्रलाई ‘दोहोरो खतरा’ तर्फ धकेल्ने संकेत... विस्तृतमा
