अन्तर्राष्ट्रिय जगतमा चलचित्रकर्मी परिचयपत्रको ठूलो महत्व छ : अध्यक्ष डिसी

काठमाडौं । चलचित्र विकास बोर्डका अध्यक्ष दिनेश डिसीले कार्ड(परिचय पत्र) मात्र बाँड्छ भन्ने टिप्पणी यसको महत्व नबुझ्नेले मात्र गर्ने गरेको औंल्याएका छन् । उनले अन्तर्राष्ट्रिय जगतमा चलचित्रकर्मी परिचयपत्रको ठूलो महत्व रहेको बताए ।

शुक्रबार भएको चलचित्रकर्मी परिचयपत्र वितरण समारोहमा बोल्दै उनले आफू बोर्डमा रहनु भन्दा अगाडि स्वतन्त्र भएर काम गर्दा परिचयपत्रको ठूलो महत्व बुझेको बताए ।

उनले भने, ‘कार्ड मात्र बाँड्छ भन्ने केही साथीहरुले भन्नुहुन्थ्यो । तर नबुझेर भन्नु भएको हो । त्यसलाई मैंले नकरात्मकरुमा लिएको छैन । अहिले पछिल्लो एक वर्ष करिब १२÷१४ महिनादेखि बोर्डमा छु । मसँग नेपाल सरकारको लोगो अंकित एउटा कार्ड छ,’ उनले थप अगाडि भने, ‘तर स्वतन्त्र भएर जीवनको ३४ वर्ष काम गरें ।  त्यो बेला एउटा परिचयपत्रको ठूलो महत्व हुन्थ्यो, । सरकारको लोगो भएको कार्ड हामीसँग हुँदैनथियो । हामीसँग स्वतन्त्र संस्थाहरुको मात्र हुन्थ्यो । त्यसको अन्तर्राष्ट्रिय जगतमा मान्यता हुँदैन थियो ।’

उनका अनुसार बोर्डले २० वर्ष काम गरेकाहरुको ७५ हजार र ३० वर्षमाथिका चलचित्रकर्मीको एक लाख बराबरको बिमा हुने व्यवस्था गरिएको छ ।

साथै, उनले बीमा दाबी गर्नका लागि प्रायः ४० दिनपछि आउने गरेकाले समस्या भएको भन्दै ३५ दिनभित्र बीमा कार्यालय र ३० दिनभित्र विकास बोर्डमा आउनुपर्ने जानकारी दिए ।

यस्तै उक्त कार्यक्रममा बोल्दै सचार तथा सूचना प्रविधि मन्त्रालयका सहसचिव कोषहरी निरौलाले परिचयपत्र मात्र पाउँदा पनि वर्षौदेखि यस क्षेत्रमा रहेकाहरुले खुशीको महसुश गर्ने बताए ।

उनले आफ्नो अनुभव सुनाउँदै भने, ‘म प्रमुख जिल्ला अधिकारी भएर इलाममा थिए । जतिखेर गोपाल भुटानी दाईको मृत्यु भयो । मृत्युपछि मात्र थाहा भयो उहाँलाई भुटानी राखेर नेपाली नागरिकता चाहिएको थियो । जुन कुरा म सजिलै पुर्याइदिन्थें ।  तर म सँग प्रस्ताव नै आइ पुगेन् । त्यस दिन मलाई साह्ै आत्मग्लानी लागेको थियो । एउटा राष्ट्रिय कलाकारले आफ्नो परिचयपत्रमा नाम लेखाउँछु भन्दा नपाई जानुपर्ने अवस्था रहयो ।’

उनले स्रोत साधनलगायत कुराहरुमा समस्या रहेको उल्लेख गर्दै चलचित्र विकास बोर्ड र नेपाल सरकार निरन्तर चलचित्र क्षेत्रको विकासका लागि काम गरिरहेको बताए ।