सरकारले फिर्ता बोलायो ११ देशका राजदूत

काठमाडौँ । सरकारले पूर्ववर्ती सरकारले नियुक्त गरेका विभिन्न देशका ११ जना नेपाली आवासीय राजदूतहरूलाई फिर्ता बोलाउने निर्णय गरेको छ।

बिहीबार सिंहदरबारमा बसेको मन्त्रिपरिषद् बैठकले चीन, जर्मनी, इजरायल, मलेसिया, कतार, संयुक्त अधिराज्यलगायतका देशमा कार्यरत राजदूतहरूलाई फिर्ता बोलाउने निर्णय गरेको हो।

सरकारका प्रवक्ता तथा सूचना तथा सञ्चार प्रविधिमन्त्री जगदीश खरेलका अनुसार फिर्ता बोलाइएका राजदूतहरूमा चीनका लागि प्रा. डा. कृष्ण प्रसाद ओली, जर्मनीका लागि डा. शैल रुपाखेती, इजरायलका लागि प्रा. धनप्रसाद पण्डित, मलेसियाका लागि डा. नेत्र प्रसाद तिमिल्सिना, कतारका लागि रमेशचन्द्र पौडेल, रुसका लागि जंगबहादुर चौहान, साउदी अरबका लागि डा. नरेश विक्रम ढकाल, स्पेनका लागि सनिल नेपाल, संयुक्त अधिराज्यका लागि चन्द्रकुमार घिमिरे, संयुक्त राज्य अमेरिकाका लागि लोकदर्शन रेग्मी र जापानका लागि दुर्गा बहादुर सुवेदी रहेका छन्।

मन्त्री खरेलका अनुसार फिर्ता बोलाइएका राजदूतहरूलाई आगामी कार्तिक २० गतेभित्र स्वदेश फर्कन निर्देशन दिइएको छ।

सरकारले कूटनीतिक नियोजनलाई नयाँ राजनीतिक सन्तुलन र विदेश नीति अनुरूप पुनःसंरचना गर्नका लागि यो निर्णय गरेको बताइएको छ।