प्रधानमन्त्रीको प्रेस संयोजकमा रामबहादुर रावल नियुक्त

काठमाडौं । अन्तरिम सरकारकी प्रधानमन्त्री सुशीला कार्कीले आफ्ना प्रेस संयोजकमा वरिष्ठ पत्रकार रामबहादुर रावललाई नियुक्त गरेकी छन्।

रावल हालसम्म अनलाइन समाचार माध्यम नेपालखबरका सम्पादकका रूपमा कार्यरत थिए। बाजुरा जिल्लामा जन्मिएका उनले यसअघि ग्यालेक्सी फोरके टेलिभिजनमा सम्पादक, साथै कान्तिपुर टेलिभिजन, नेपाल साप्ताहिक, र नेपाल एफएमलगायत विभिन्न सञ्चारमाध्यममा डेढ दशकभन्दा बढी समयसम्म पत्रकारिता गरेका छन्।

शैक्षिक रुपमा, रावलले त्रिभुवन विश्वविद्यालयबाट नेपाली विषयमा स्नातकोत्तर र कानुनमा स्नातक गरेका छन्। पत्रकारिता क्षेत्रमा उनको योगदान र अनुभवलाई मध्यनजर गर्दै प्रधानमन्त्री कार्कीले उनलाई प्रेस संयोजकको जिम्मेवारी सुम्पिएको बताइएको छ।

नियुक्तिपछि रावलले आफूलाई विश्वास गरेर दिएको जिम्मेवारीप्रति प्रधानमन्त्री कार्कीप्रति आभार व्यक्त गर्दै निष्पक्ष, उत्तरदायी र व्यावसायिक ढंगले आफ्नो भूमिका निर्वाह गर्ने प्रतिबद्धता जनाएका छन्।