तोलामा ४३ सयले घट्यो सुन, कतिमा हुँदैछ कारोबार ?

काठमाडौं । नेपाली बजारमा मंगलबार सुनचाँदीको मूल्य उल्लेख्य रूपमा घटेको छ। नेपाल सुनचाँदी व्यवसायी महासंघका अनुसार छापावाल सुनको मूल्य प्रतितोला रु. ४ हजार ३०० ले घटेर रु. २ लाख ८४ हजार २०० कायम भएको छ।

अघिल्लो कारोबार दिन छापावाल सुन प्रतितोला रु. २ लाख ८८ हजार ५०० मा कारोबार भएको थियो। एकै दिनमा चार हजारभन्दा बढीले मूल्य घटेपछि सुन खरिद गर्ने उपभोक्ताका लागि बजार केही सहज बनेको छ।

यस्तै, चाँदीको मूल्य पनि घटेको छ। महासंघका अनुसार चाँदी प्रतितोला रु. १३५ ले घटेर रु. ४ हजार ३१० मा झरेको छ। यसअघि चाँदी प्रतितोला रु. ४ हजार ४४५ मा कारोबार भएको थियो।

अन्तर्राष्ट्रिय बजारमा सुनचाँदीको मूल्यमा आएको उतारचढाव, अमेरिकी डलरको विनिमय दर तथा अन्य आर्थिक सूचकहरूको प्रभाव नेपाली बजारमा पनि पर्ने भएकाले सुनचाँदीको मूल्य दैनिक रूपमा परिवर्तन हुने गरेको व्यवसायीहरू बताउँछन्।