अनसनरत डा. गोविन्द केसीको स्वास्थ्य अवस्था गम्भीर, आईसीयूमा भर्ना गर्ने तयारी

धनगढी । २४औँ सत्याग्रहमा रहेका प्राध्यापक डा. गोविन्द केसीको स्वास्थ्य अवस्था लगातार बिग्रिँदै गएपछि उनलाई सेती प्रादेशिक अस्पतालको सघन उपचार कक्ष (आईसीयू)मा भर्ना गर्ने तयारी गरिएको छ।

धनगढीस्थित कृष्ण मन्दिर धर्मशालामा अनशनरत डा. केसीको नियमित स्वास्थ्य परीक्षणका क्रममा रक्तचाप ११०/९० र रगतमा सुगरको मात्रा ५० पुगेको पाइएको चिकित्सकहरूले बताएका छन्। रगतमा सुगरको मात्रा अत्यन्त न्यून भएकाले तत्काल चिकित्सकीय निगरानी र उपचार आवश्यक रहेको उनीहरूको भनाइ छ।

डा. केसीका सहयोगी डा. अमृत जैसीका अनुसार लामो समयदेखि निराहार बसिरहेका कारण उनको स्वास्थ्यमा थप जटिलता देखिन थालेको छ। मांसपेशी बाउडिने, स्पष्ट रूपमा बोल्न कठिन हुने तथा हिँडडुल गर्नसमेत समस्या भइरहेको उनले जानकारी दिए।

चिकित्सकहरूले अवस्था थप गम्भीर हुन नदिन तत्काल आईसीयूमा राखेर उपचार गर्न सिफारिस गरेपछि उनलाई सेती प्रादेशिक अस्पताल लैजाने तयारी गरिएको हो।

यता, डा. केसी अनशनरत रहेको कृष्ण मन्दिर धर्मशालाबाहिर भने विरोध प्रदर्शनसमेत भएको छ। शहीद दशरथचन्द स्वास्थ्य विज्ञान विश्वविद्यालय संघर्ष समितिको नेतृत्वमा प्रदर्शन गर्दै सहभागीहरूले ‘गोविन्द केसी गो ब्याक’ भन्दै नाराबाजी गरेका छन्। उनीहरूले डा. केसीलाई सत्याग्रह फिर्ता लिन आग्रह गरेका छन्।

डा. केसी बिहीबारदेखि पाँचबुँदे माग अघि सार्दै धनगढीस्थित कृष्ण मन्दिर धर्मशालामा २४औँ सत्याग्रहमा बसेका छन्। उनको स्वास्थ्य अवस्था नाजुक बन्दै गएपछि चिकित्सक, सहयोगी तथा प्रशासनले उपचार र निगरानीलाई थप सघाएको जनाइएको छ।