सरकारी अस्पतालमा जन्मिने प्रत्येक शिशुलाई १ ग्राम सुनको औंठी दिने थलापति विजयको घोषणा

चेन्नई ।   भारतको तमिलनाडु सरकारले सरकारी अस्पतालमा जन्मिने प्रत्येक नवजात शिशुलाई १ ग्राम सुनको औंठी उपहार दिने महत्त्वाकांक्षी योजना घोषणा गरेको छ। मुख्यमन्त्री सी. जोसेफ विजय नेतृत्वको सरकारले ‘थाइमामन थङ्गा मोथिरा थिट्टम’ (मामाको सुनको औंठी योजना) अन्तर्गत यो कार्यक्रम सञ्चालन गर्न लागेको हो।

सरकारले यो योजना तमिल संस्कृतिमा प्रचलित ‘थाइमामन सिर’ परम्पराबाट प्रेरित भएको जनाएको छ। उक्त परम्पराअनुसार नवजात शिशुलाई मामाको तर्फबाट सुन उपहार दिएर स्वागत गर्ने चलन छ। अब राज्य सरकारले नै प्रत्येक नवजात शिशुको ‘मामा’को भूमिका निर्वाह गर्दै सुनको औंठी उपहार दिने सरकारी निर्णयमा उल्लेख गरिएको छ।

योजनाका लागि तमिलनाडु सरकारले वार्षिक ७५५.८३ करोड भारतीय रुपैयाँ बजेट विनियोजन गरेको छ। कार्यक्रमको औपचारिक शुभारम्भ आगामी सेप्टेम्बर १५ मा पूर्वमुख्यमन्त्री सी.एन. अन्नादुराईको जन्मजयन्तीका अवसरमा गरिनेछ। यद्यपि, योजना जुन २२, २०२६ देखि पूर्वप्रभावी रूपमा लागू हुने भएकाले त्यसयता सरकारी अस्पतालमा जन्मिएका सबै योग्य शिशुले सुनको औंठी प्राप्त गर्नेछन्।

यो सुविधा तमिलनाडुका स्थायी बासिन्दा परिवारका शिशुका लागि मात्र उपलब्ध हुनेछ। लाभ लिन अभिभावकले रासन कार्ड, आधार कार्ड वा स्थायी बसोबास प्रमाणित गर्ने अन्य आधिकारिक कागजात पेश गर्नुपर्नेछ। साथै, शिशु छोरा वा छोरी, पहिलो वा पछिल्लो सन्तान जे भए पनि कुनै भेदभाव नगरी सबैलाई समान रूपमा यो सुविधा उपलब्ध गराइने सरकारले जनाएको छ।

सरकारका अनुसार योजनाको उद्देश्य सरकारी स्वास्थ्य संस्थाप्रति नागरिकको विश्वास बढाउनु, सुरक्षित संस्थागत प्रसूति प्रोत्साहन गर्नु, मातृ तथा शिशु स्वास्थ्यलाई थप सुदृढ बनाउनु तथा तमिल सांस्कृतिक परम्पराको संरक्षण गर्नु हो। सरकारी तथ्यांकअनुसार तमिलनाडुमा वार्षिक करिब ७.८ लाख प्रसूति हुने गरेका छन्, जसमध्ये ९९.९ प्रतिशत जन्म स्वास्थ्य संस्थामै हुने गरेको छ।